Këtë javë bashkë do të gatuajmë ”Gjyveç me mish qengji dhe turli”. Enët e thella prej balte të pjekur dhe gjellët që gatuhen në këtë enë në gjuhën turke quhen “gjyveç” (tavë dheu e thellë). Në këto enë mund të gatuajmë çdo lloj mishi, perime apo bishtajore.
Harxhet e vendosura brenda në gjyveç mund të gatuhen në mënyrë tradicionale në furrë druri, por edhe në furrë elektrike dhe mbi sobë. Pavarësisht se çfarë zjarri përdorni për të gatuar, gjëja që duhet të bëni kujdes është që gjellët në gjyveç kërkojnë më shumë kohë se sa zakonisht për t’u bërë. Arsyeja për këtë është ngrohja dhe ftohja me vonesë e tavave të dheut. Në të vërtetë këtu qëndron edhe sekreti i gatimit të shijshëm në këto enë. Edhe ”gjyveçi me mish qengji dhe turli”, recetën për gatimin e së cilës do ta ndajmë bashkë, është një gjellë e shijshme, ku mishi i qengjit gatuhet ngadalë dhe në harmoni me perimet.
Ashtu si çdoherë fillimisht t’i numërojmë harxhet e nevojshme për gatimin e kësaj gjelle:
- 700 g mish qengji të prerë në copa të vogla
- 2 qepë mesatare
- 4 speca të gjelbër
- 4 kokrra domate
- 2 patëllxhan
- 3 patate mesatare
- 1 karotë mesatare
- 1 kungulleshkë mesatare
- 1 lugë gjelle salcë domatesh
- 3 thelpinj hudhre
- 1 lugë e vogël rigon të tharë
- 1 lugë e vogël piper të zi
- pak kripë
- gjysmë gote uji vaj ulliri
Tani ta gatuajmë gjellën: Fillimisht gjyveçin që do të përdorim e lyejmë përbrenda me vaj me një furçë. Nëse dëshironi fundin e gjyveçit mund ta fërkoni edhe me një hudhër. Në këtë mënyrë aroma e hudhrës do t’i japë pjatës tuaj më shumë shije. Tani në fund të gjyveçit fillimisht vendosim mishin. Qepën e grirë në formë gjysmëhëne e vendosim mbi mishin dhe mbi to specat e gjelbër të grirë. Pastaj grijmë në madhësi të njëjtë me mishin patëllxhanët, kungulleshkën dhe patatet dhe i vendosim mbi speca me radhë fillimisht patatet, pastaj patëllxhanët dhe në fund kungulleshkën. Afër grykës së gjyveçit vendosim domatet e prera në formë rrethore. Salcën e domateve e trazojmë me pak ujë, brenda hedhim piperin e zi, kripën, rigonin dhe vajin e ullirit dhe e përziejmë mirë. Këtë salcë e hedhim sipër gjellës, të cilën e pjekim në zjarr të ulët mbi sobë për 1 orë – 1 orë e gjysmë. Pasi të jetë gati gjyveçin me mish e shërbejmë të ngrohtë.
Ju bëftë mirë./Gazeta Mejdani/
Discussion about this post