Qytetarët e Kosovës mbrëmë kanë pasur rastin të dëgjojnë storie të pabesueshme rreth vjedhjeve dhe humbjeve në Telekomin e Kosovës, përcjell Gazeta Mejdani.
Në emisionin “Context” ATV, është biseduar gjerë e gjatë për këto vepra kriminale të bëra aty dhe ndaj ekonomisë së vendit.
Koordinatat mes klasës politike dhe njerëzve që i kanë akomoduar në Telekom, sipas asaj që dëgjohet në emision, kanë qenë të parapërgatitura dhe të qëllimshme për shkatërrimin e Telekomit. E gjithë, sipas panelistëve, për ta shembur deri në themel e pastaj për ta shitur sa më lirë.
Duke marrë pjesë në debat, ish-deputeti i Kuvendit të Kosovës, Milaim Zeka ka fajësuar Partinë Demokratike të Kosovës për gjendjen në të cilën ndodhet sot Telekomi i Kosovës.
Ai ka folur në cilësinë kur ka qenë zëvendëskryetar i komisionit Hetimor Parlamentar në lidhje me gjendjen në PTK dhe Vala, gjersa ka hedhur akuza ndaj të gjithë drejtorëve që për vite kanë udhëhequr me këtë kompani. Zeka nuk e la pa e përmendur edhe atë se PDK së bashku me LDK-në i kanë koordinuar punët, parti këtyre të cilave më pastaj u kanë ndihmuar edhe Nisma dhe AAK-ja.
Sipas Zekës, pothuajse të gjithë drejtorët e PTK-së kanë qenë njerëz të PDK-së.
“Është një fakt i pamohueshëm që Partia Demokratike e Kosovës, publikisht, në mënyrën më transparente të mundshme në një marrëveshje sekrete të heshtur me LDK-në, të gjithë drejtorët prej Adnan Merovcit deri te Etrur Rrustemi e Shyqri Haxha e drejtori tjetër ky i Vushtrrisë, Bedri Istrefi të gjithë i ka pasur njerëz të PDK-së,” – ka thënë Zeka.
Kjo deklaratë e tij e ka ngacmuar ish-kryeshefin ekzekutiv të Telekomit, Shyqyri Haxha i cili ka qenë në lidhje virtuale në “Context”. Ai i ka quajtur të paqëndrueshme deklaratat e Zekës gjersa ka hedhur poshtë mundësinë e të qenit pjesë e PDK-së.
“Milaim këto deklarata të cilat ju po thoni janë të paqëndrueshme, unë skam qenë asnjëherë pjesë e PDK-së, as nuk kam qenë anëtar i PDK-së, as nuk kam qenë vegël e PDK-së dhe jam i vetmi drejtor që kam pasur probleme me partitë që ka qenë në pushtet atë kohë, në fakt me dy partitë dhe ministrat e tyre,” – ka thënë Haxha.
Për më tepër, informacionet që dëgjohen në këtë emision, janë vështirë për tu besuar. Sipas gjithë asaj që thuhet aty, hajnitë, keqpërdorimet dhe humbjet e shkaktuara qëllimshëm janë orkestruar nga klasa politike e cila ka udhëhequr vendin deri në ditët e sotshme, e sidomos nga liderët politikë të partive në pushtet.
Në emision përmendet edhe ish-Ministri Besim Beqaj për të cilin u tha se ekonomisë së vendit i ka shkaktuar dëme të mëdha.
Ajo që e bënë edhe më të pabesueshëm gjithë atë që dëgjohet aty, është konsitatimi i pjesëmarrësve në emision se kjo që ka ndodhur në Telekom, është vetëm 10%-shi i asaj që ka ndodhur në Trepçë dhe korporatat tjera poblike të vendit. Gjithandej nëpër Kosovë është keqpërdorur dhe është shkatërruar në mënyrë të organizuar dhe kronologjike.
Përgjatë emisionit, përmenden emra dhe mbiemra të ministrave dhe udhëheqsëve të ndryshëm politik që i kanë kryer këto krime ndaj ekonomisë së Kosovës./Gazeta Mejdani/
Debatin e plotë mund ta ndiqni në videon më poshtë:
