Kozmonautët rusë, të cilët pritet të nisen drejt Stacionit Ndërkombëtar Hapësinor muajin e ardhshëm, thonë se ende është shumë herët për ta që të marrin vaksinën e shumëlavdëruar nga presidenti i Rusisë, Vladimir Putin.
“Personalisht, dua të them se nuk do të vaksinohesha sepse e trajtoj me shumë kujdes këtë çështje”, ka thënë Sergei Ryzhikov, 46-vjeçar, lider i ekspeditës së radhës në Stacionin Hapësinor gjatë muajit tetor.Ai dhe kozmonautë tjerë kanë vendosur maska në qendrën e trajnimit jashtë Moskës gjatë kohës që zhvillonin konferencën për shtyp online.
Komentet e tij erdhën pasi Putin e ka lavdëruar fort vaksinën e koronavirusit e cila është zhvilluar në kohë rekorde.Kjo vaksinë është emëruar “Sputnik V”, sipas satelitit të periudhës sovjetike, njëherësh i pari i nisur ndonjëherë në Hapësirë më 1957.
“Në momentin që vaksina testohet dhe vërtetohet besueshmëria e saj, atëherë do të merret vendimi për t’iu rekomanduar kozmonautëve vaksinimin”, ka thënë kozmonauti tjetër, Sergei Kud-Sverchkov.
Insistoi se ky vendim varet nga mjekët që janë përgjegjës për shëndetin e kozmonautëve, përfshirë imunizimin. Rusia ngjalli shqetësime në mesin e shkencëtarëve perëndimorë, kur njoftoi se vaksina e saj kundër koronavirus është miratuar para se të kryhen të gjitha testimet klinike./Gazeta Mejdani/
