Tashmë hashtagu #we_love_mohammad_ﷺ_challenge i ka kapur 5 milionë përdoruesit, duke i kaluar përmasat e zakonshme të virales dhe e gjithë kjo fushatë globale ndodh pikërisht kur një pjesë e madhe e botës muslimane po kërcënohet nga segmentet shtetërore të një laicizmi ekstrem që shkon në ateizëm.
Shkruan: Roald A. Hysa
Tashmë edhe arena shqiptare është e afektuar nga debatet Liri e Fjalës dhe Liri e Besimit, ku po shohim rëndom akuzat se muslimanët janë të dhunshëm. Pas këtij togfjalëshi muslimanë të dhunshëm po kamuflohet një fushatë e tërë dhe po justifikohen dhunimet e qëllimshme për të kaluar në pozicione difensive skuadrën kundërshtare. Ne si muslimanë nuk e kemi problem të na ofendojnë, por publiku i gjerë nuk mund të mbulojë me lirinë e fjalës cenimin e shenjtërive tona.
Dashuria për Profetin tonë Muhamedin alejhi selam po shihet gjallërisht këto ditë çka edhe përbën shenjtërinë e jetëve tona. Ne jemi të prekur jo thjesht në individualitetin tonë, ne jemi prekur mu në thelbin tonë tek shenjtëria e individualitetit tonë, thelbi individual i fesë Dashuria për Profetin alejhi selam, dashuri e cila të çon tek një dashuri më e madhe: ajo e Zotit të Gjithësisë dhe e shpëtimit.
E gjitha kjo dihet tashmë dhe lumenjtë e Fjalës së Lirë nuk mund ta zhbëjnë të gjithë këtë dashuri dhe ne nuk mund ta tolerojmë akuzën e pabazë që po na përsëritet rregullisht, se muslimanët janë të dhunshëm. Me një rast të izoluar nuk do të arrijnë të ngrejnë një kauzë të besueshme. As edhe me një tufë analistësh të cilët rendin pas pushtetit dhe parasë. Ne e duam Profetin Muhamed alejhi selam dhe me lejen e Allahut deri sa të kemi frymë do ta duam.
Për ditë ne e kemi mevlud dhe për ditë ne i dërgojmë salavate krijesës më të mirë të Zotit, Muhamedit alejhi selam.
