Limaj në Gjilan: 6 tetori, mundësi vendimtare për 100 vitet e ardhshme të Kosovës!

Kandidati për kryeministër të Kosovës nga koalicioni Nisma-AKR-PD, Fatmir Limaj gjatë pasdites ka takuar strukturat e partisë se tij në qytetin e Gjilanit, prej ku premtoi se kauza e këtij koalicioni do ta çojë Kosovën përpara.

Limaj duke iu referuar sloganit “Bashkë për shtetin” tha se nuk shkohet përpara si shtet pa u bashkuar duke ofruar paketa mashtruese për qytetarët e Kosovës.

Pretendenti për kryeministër të Kosovës, Fatmir Limaj ka thënë se do punojnë gjithmonë për të gjitha kategoritë e shoqërisë për të forcuar Kosovën. Sipas tij 6 tetori është mundësi e veçante për Kosovën dhe vendimtare ndoshta edhe për 100 vitet e ardhshme të Kosovës.

Ai kërkoi nga gjilanasit të jenë të kujdesshëm se kujt po ia japin votën.

“Shumë është e mundur që ky parlament që ka me u zgjedh me 6 tetor do të ngrisë dorën për marrëveshjen me Serbinë dhe ne të gjithë duhet të mendojmë se kujt duhet me ia dhënë besimin si me na e bë marrëveshjen me Serbinë. Kush duhet të ulet në tavolinë e te negocioje marrëveshjen më ta sot bota juaj nuk është thjeshtë me qunjë rend ju nana e ju prindër keni kujdes se jeni tu vendos edhe për të ardhmen e fëmijës të fëmijës tuaj”, tha ai.

Teksa ka premtuar përkrahje për punëtorin, rininë, gruan Limaj ka kritikuar qeveritë e deri tanishme në Gjilan që nuk kanë siguruar ujë të pijes dhe stadium për gjilanasit.

“Dy gjëra që janë më të rëndësishme si kanë bërë krejt i kisha lënë punët e dy gjëra se kisha lënë pa ua dhënë ujin e pijes dhe stadiumin. Me i pas dy ekipe që krenohet jo vetëm Kosova por Shqiptaria e mos me pas një stadium modern bash marre”, tha ai.

Kryetari i degës së Nismës Socialdemokrate, Sevdail Robelli tha se deri më 6 tetor do kërkojnë votën e gjilanasve për tu bashkuar rreth programi i cili sipas tij ia kthen nderin qytetarit të Gjilanit dhe këtë qytet e kthen në zonë regjionale.

Ai u shpreh se me ardhjen në qeveri të Nismës Socialdemokrate do zgjidhet problemi i ujit të pijshëm për qytetarët e Gjilanit.

“Së bashku me kryeministrin Limaj qytetarëve të Gjilanit do ia kthejmë dinjitetin dhe Gjilani do jetë qendër rajonale dhe qeveria e ardhshme e udhëhequr nga Fatmir Limaj do të kujdeset seriozisht për problemet e këtij qyteti. Do të filloj me prioritet të merremi me problemin më të madh të këtij qyteti ujin e pijes nuk do të qëndrojmë të lutemi derisa të ketë reshje atmosferike por së bashku do i përvishemi seriozisht kësaj pune”, tha ai.

Kandidatët për karrigen e deputetin të Nismës Socialdemokrate në legjislaturën e shtatë të Kuvendit të Kosovës nga Gjilani janë: Sevdail Robelli, Valdete Bajrami dhe Milaim Kosumi.