Kush është ‘Zonja e parë’ e Ukrainës, Olena Zelenskiy?
Pas sulmit të pare të Rusisë në Ukrainë, sytë ishin kthyer nga Presidenti Zelensky i cili refuzoi kërkesat për ikje për shkak të një atentati të mundshëm, transmeton Gazeta Mejdani.
Pasi Presidenti Zelenskiy hodhi poshtë ofertat e largimit për të parandaluar rrëmbimin ose kapjen e tij nga Rusia, gruaja e tij Olena gjithashtu njoftoi se ajo nuk do të largohej nga vendi i saj.
“Unë jam me bashkëshortin tim dhe jam me ju”, kishte thënë Olena
Duke thënë se do të qëndrojë në Ukrainë me bashkëshortin dhe fëmijët e saj, zonja e parë iu drejtua njerëzve nëpërmes llogarisë së saj në Instagram.
“Njerëzit e mi të dashur ukrainas! Unë po ju shikoj të gjithëve sot. Të gjithë ata që shoh në TV, në rrugë, në internet. Po shikoj telefonatat që mi keni bërë. Dhe a e dini? Jeni të gjithë të mrekullueshëm! Jam krenare që jetoj në të njëjtin vend me ju. Ne jemi një ushtri e madhe. Dhe sot nuk po qaj as nuk kam frikë. Unë jam e qetë dhe e sigurt. Fëmijët e mi po më shikojnë. Unë jam me ta, jam me bashkëshortin tim. Dhe unë jam me ju. Unë ju dua. Unë e dua Ukrainën.”
E lindur më 6 shkurt 1978 në Kryvyi Rih, atëherë pjesë e Bashkimit Sovjetik, në një rajon rusishtfolës, Olena është mbështetësja më e madhe e bashkëshortit të saj, Vladimir Zelenskit.
Edhe pse në fillim nuk i pëlqente që burri i saj të hynte në politikë, ajo u bë ‘zonja e parë’ e Ukrainës më 20 maj 2019, me zgjedhjen e Zelenskit si President i Ukrainës.
Që nga ajo ditë, ajo preferoi të përdorte pozicionin e saj për të drejtat e grave dhe fëmijëve dhe punoi për aksesin e fëmijëve në ushqim dhe barazinë gjinore.
Ajo inicioi pjesëmarrjen e Ukrainës në Partneritetin Biarritz, iniciativën ndërkombëtare të G7 për barazinë gjinore, dhe mbështeti Kongresin e Grave të Ukrainës, një platformë që punon për të drejta të barabarta.
Ajo ka studijuar për arkitekturë ndërsa Vladimir Zelenski për drejtësi në Universitetin Kombëtar Kryvyi Rih.
Vladimir dhe Olena u martuan në shtator 2003.
Vajza e çiftit Oleksandra lindi në korrik 2004, dhe djali i tyre Kirilo lindi në janar 2013.
E vlerësuar për elegancën dhe sensin e saj të modës, pozat e Zonjës së Parë në kopertinën e Vogue Ukraine u diskutuan gjatë.
Nga ana tjetër, Olena Zelenski u rendit e 30-ta në listën e 100 ukrainasve më me ndikim në botë të përgatitur nga Revista Focus në dhjetor 2019./Gazeta Mejdani/
