Bodo Weber, eksperti gjerman për Ballkanin dhe një bashkëpunëtor i Këshillit për Politikën e Demokratizimit në Berlin, tha se në administratën Trump nuk mund të përjashtohet plotësisht ndonjë befasi.
Ai thotë se sinqerisht dyshon se në tavolinën në Washington këtë javë në kuadër të dialogut Kosovë-Serbi të gjendet ndonjë marrëveshje politike e lëre ndonjë marrëveshje finale.
“Z. Grenell nuk ka kontribuar në arritjen e një marrëveshje përfundimtare në vitin e fundit, por krejt e kundërta – ai minoi përpjekjet e Bashkimit Evropian për të rivendosur negociatat mbi një marrëveshje gjithëpërfshirëse, dhe meqenëse angazhimi i administratës amerikane synon më pak në zgjidhjen e konfliktit të qëndrueshëm midis Serbisë dhe Kosovës. Më shumë për rizgjedhjen e Trumpit, si dhe interesat personale të Z. Grenell, në këto momente këto interesa shërbehen kryesisht nga një lloj marrëveshje ekonomike. Kjo është arsyeja pse unë pres që kësaj here deklaratat zyrtare të Washingtonit që negociatat këtë javë do të përqendrohen në ekonomi të jenë të vërteta”, tha ai.
I pyetur se a do të rritet presioni mbi Serbinë në mënyrë që Beogradi të pranojë një marrëveshje me Prishtinën, ai deklaroi se duhet pritet dhe shihet se cili është karakteri i marrëveshjeve ekonomike që do të jenë në tryezë, domethënë, nëse dhe si ato prekin çështjen e statusit të Kosovës. Prandaj, presioni do të jetë mbi negociatorët serbë ose të Kosovës.
Se a do të jetë problem për delegacionin e Kosovës në Shtëpinë e Bardhë mospjesëmarrja e poltikanvëve si Hashim Thaçi, Kadri Veseli dhe Albin Kurti, ai tha se madhësia dhe përbërja e delegacionit të Kosovës dhe mënyra e përbërjes së tij tregojnë qartë se çfarë është njohuria e përbashkët – se qeveria aktuale në Prishtinë ekziston më shumë në letër sesa në realitet.
”Nuk ka asnjë pozicion të përbashkët negociues, aq më pak një platformë, as një ekip të përbashkët të koalicionit qeverisës, e aq më pak unitetin e partive parlamentare. Dhe ky kaos i akterëve në Prishtinë, i cili kurrë nuk ka qenë më i madh se fillimi zyrtar i negociatave për një marrëveshje gjithëpërfshirëse tre vjet më parë, është një garanci shtesë se asgjë e rëndësishme nuk do të ndodhë në Washington, qoftë pozitivisht apo negativisht”, shtoi Weber.
