Ish-kandidatja për deputete në Kuvendin e Kosovës, tani asambleiste në Komunën e Prishtinës, Fiknete Bejta ka shkruar sot në lidhje me shkollimin e vajzave me mbulesë, përcjell Gazeta Mejdani.
Ajo ka thënë se institucionet e vendit duhet të angazhohen në parandalimin e shkeljes së mëtutjeshme të së drejtës në arsim.
Për më tepër, shkruan Fiknete Bejta, nuk duhet të ndalohet manifestimi i fesë të vajzave në Kosovë, por kjo çështje duhet të rregullohet siç parasheh Kushtetuta në nenet 38 dhe 48.
Ajo ka thënë se Ministria e Arsimit, Shkencës dhe Teknologjisë, duhet të largojë udhëzimin administrativ që ndalon bartjen e shamisë në shkolla.
Fiknete Bejta është e njohur me qëndrimet e saj konstruktive në të gjitha sferat ku ajo ka dhënë dhe vazhdon të jep kontributin e saj.
Më poshtë gjeni postimin e plotë në llogarinë e saj në Facebook:
Ministria e Arsimit, Shkencës dhe Teknologjisë, duhet të largojë udhëzimin administrativ që ndalon bartjen e shamisë në shkolla. Ky Udhëzim Administrativ bije ndesh me Kushtetutën e Republikës së Kosovës.
Këto institucione, duhet të respektojnë në plotni dispozitën e nenit 55 të Kushtetutës, sipas të cilës “të drejtat dhe liritë kushtetuese mund të kufizohen vetëm me LIGJ” dhe jo me akte nënligjore siç janë Udhëzimet Administrative apo Rregulloret e qeverisë.
Institucionet gjithashtu duhet të angazhohen në parandalimin e shkeljes së mëtejshme të së drejtës në arsim dhe të drejtës për manifestimin e fesë të vajzave në Kosovë, siç e parasheh Kushtetuta në nenet 38dhe 48.
Mënyra e veshjes është zgjedhje e lirë e secilit.
