Ardhja e Kurtit në Qeveri, fundi i Thaçit në Presidencë!

Kreu i Lëvizjes Vetëvendosje dhe njëkohësisht kandidati për kryeministër nga radhët e saj, Albin Kurti, ka thënë se Presidenti Hashim Thaçi duhet të japë dorëheqje ose ndryshe do të shkarkohet.

E gjithë kjo vjen pasi populli nuk do ta jap Mitrovicën për Bashkim Kombëtar. Kurti mes tjerash ka thënë se rënia e dëshirës për bashkim vjen nga ideja e shkëmbimit të territoreve, po njerëzit nuk duan të japin Mitrovicën për bashkim kombëtar. “Në Kosovë ka shumë politikanë që flasin për shkëmbim duke hequr dorë nga veriu. Në Serbi nuk ka asnjë politikan që flet për falje territori’, ka thënë mes tjerash Kurti.

Nga ana tjetër, njohësit e çështjeve politike vlerësojnë se Thaçi nuk ka se çfarë lyp më në postin e Presidentit, për shkak se jo vetëm që ka humbur autoritetin me ide shkëmbimesh territoresh me Serbinë, por edhe ka mbetur i vetmuar e pa forcë partiake qeveritare.

Sipas tyre, me dorëheqjen apo shkarkimin e Thaçit vdes edhe ideja e Vuçiqit për shkëmbime territoresh, sa më shpejtë të jep dorëheqja aq më mirë për Mitrovicën dhe Republikën Kosovës.

Ata po ashtu vlerësojnë se Thaçi disa herë e ka shkelur Kushtetutën e Kosovës, dhe rasti më eklatant ishte dëbimi i 6 shtetaseve turq, i njohur si rasti i “Gylenistëve”, të cilëve qeveria jonë ua kishte njohur statusin e azilantëve politik.

Krasniqi: Nuk besoj se një deputet shqiptar është çmendur të votojë një marrëveshje të dëmshme për Kosovën

Por, politologu Faik Krasniqi, ka thënë se Bashkimi Kombëtar nuk arrihet duke falë territor Serbisë, e aq më pak Mitrovicën.

Sipas tij, për ta shkarkuar Presidentin duhen votat e 81 deputetëve të Kuvendit të Kosovës.

“Kështu që koalicionit LVV-LDK, dhe minoriteteve jo serbe i duhen edhe votat e AAK-së. Besoj që votat e tyre do të siguroheshin për shkarkimin e tij, por një gjë duhet ta potencojmë. Kosova është republikë parlamentare, asnjë marrëveshje ndërkombëtare s’mund të kalojë pa u votuar në Kuvendin e Kosovës me votat e shumicës së deputetëve të Kosovës. Kështu që nuk shoh ndonjë rrezik edhe nëse presidenti Thaçi të këtë bërë marrëveshje tinëzarë me Vuçiqin. E them këtë sepse asnjë deputet shqiptar nuk është çmendur të votojë një marrëveshje të dëmshme për Kosovën. Sidoqoftë Hashim Thaçi duhet të largohet, qoftë me dorëheqje qoftë me shkarkim, sepse ky njeri i ka bërë dëme të mëdha Kosovës”, ka thënë politologu Krasniqi.

/Diana Bunjaku/