Kjo është gjendja shëndetësore e dy të mbijetuarve në Lagjen e Spitalit!

Dy të vdekur dhe dy të plagosur është bilanci tragjik i gjuajtjes me armë dje në Lagjen e Spitalit, transmeton Gazeta Mejdani.

Mjekët në QKUK kanë folur rreth gjendjes aktuale shëndetësore të dy personave të tjerë, të plagosur nga të shtënat me armë zjarri sot në lagjen “Mati 1” në Prishtinë, ku kanë humbur jetën edhe dy persona si pasojë e marrjes së plagëve,

Avdush Bajgora, specialist reanimator, tha se për momentin mjekët janë duke kryer dy intervenime kirurgjike në sallat emergjente.

“Kanë ardhur në gjendje shumë të rëndë, dy kanë ndërruar jetë, njëri ka qenë i goditur me armë zjarri në kokë dhe nuk u ka mbijetuar plagëve, ndërsa pacienti tjetër ka qenë i lënduar në kraharor, gjithashtu me armë zjarri dhe nuk ka mundur t’u mbijetojë plagëve. Momentalisht në sallat emergjente kirurgjike janë duke u kryer dy intervenime kirurgjike, njëri ka lëndime në kokë gjithashtu me armë zjarri, është duke intervenuar ekipi i neurokirurgjisë, ndërsa pacienti tjetër i cili ka lëndime të enëve vitale të ekstremiteteve, është duke intervenuar ekipi i kirurgjisë vaskulare“, tha Bajgora.

Ndryshe, katër persona janë plagosur në lagjen “Mati 1”, gjatë një përleshje mes dy familjeve për shkak të kontestit pronësor. Dy prej tyre, kanë vdekur më vonë si pasojë e plagëve të marra./Gazeta Mejdani/