Ministri i Mbrojtjes së Serbisë, Aleksander Vulin, ka reaguar ashpër pas një interviste në Gazetën Express të presidentit të Maqedonisë Veriore, Stevo Pendarovski, në të cilën kreu i shtetit maqedonas kundërshtoi idenë e korrigjimit të kufijve në mes të Kosovës dhe Serbisë.
Vulin ka thënë se askush nuk do ta pyet Pendarovski dhe as s’do të marrë opinionin e tij për atë se si Serbia duhet të zgjidh problemin me Kosovën.
“Askush nuk do ta pyet Pendarovskin për opinionin e tij rreth zgjidhjes së problemit me Kosovën”, ka thënë Vulin, raporton Gazeta Express.
Ministri serb tutje ka thënë se Serbia do të vendos vetë se si do të zgjidhet problemi me Kosovën dhe se Pendarovskin nuk do ta pyet askush apo t’i marrë opinion lidhur me këtë çështje.
Ai ndër të tjera ka thënë se është shumë pak e rëndësishme se çfarë Stevo Pendarovski mendon për çështjet dhe problemet në vendet fqinje.
Vulin përveç tjerash ka kërkuar heshtjen e presidentit Pendarovski duke shfrytëzuar çështjen e identitetit maqedonas.
Ai ka thënë se kreu i shtetit maqedonas duhet të heshtë meqë Serbia është e vetmja që ia njeh gjuhën maqedonase, derisa thotë se nëse flet në gjuhë të tjera askush nuk do t’ia pranojë e kërkojë mendimin.
“Presidenti i Maqedonisë së Veriut lirisht mund të hesht në gjuhën që nuk ia njeh askush përveç Serbisë, e në gjuhë tjera mund të heshtë edhe më shumë pasi askush as nuk i kërkon e as nuk ia pranon mendimin”, ka thënë Vulin
Të premtën ekskluzivisht për Gazetën Express nga zyra për media e Presidencës së Maqedonisë së Veriut, kanë thënë se Pendarovski beson që korrigjimi i kufijve apo shkëmbimi i territoreve mund të ketë efekte të dëmshme dhe se rrezikon gjithë progresin
“Presidenti Pendarovski beson se zgjidhjet që mund të çojnë në korrigjimin e kufijve dhe shkëmbimin e tokës dhe njerëzve mund të kenë ndikim të pafavorshëm në rajon dhe efekt të dëmshëm për përpjekjet gjithëpërfshirëse të bëra në rimëkëmbjen pas konfliktit të rajonit dhe në ndërtimin e shoqërive të qëndrueshme multi-etnike”, ka thënë për Gazetën Express, Biljana Radeva.
Presidenti i Maqedonisë së Veriut, Stevo Pendarovski, është kundër idesë së korrigjimit të kufijve mes Kosovës dhe Serbisë. Sipas tij, një zgjidhje që mund të vijë përmes një ideje të tillë do të ketë efekte të dëmshme për rajonin dhe do të vërë në rrezik gjithë progresin që është bërë në 20 vjetët e fundit. Pendarovski ndërkohë mbështet përpjekjet e SHBA-së dhe BE-së në raport me dialogun Kosovë-Serbi dhe thotë se është për një marrëveshje kompromisi mes Prishtinës dhe Beogradit që ka garancinë e fortë ndërkombëtare dhe që i kontribuon stabilitetit./GazetaExpress/
