E moshuar ndaj së cilës është ushtruar dhunë dhe torturë sot në Shtëpinë e Pleqve në Pejë është nënë e dëshmorit të UÇK’së, Taulant Nura.
Ishin pamje të tmerrshme ato që sot u shfaqen në një video të publikuar në rrjetet sociale, e që e kanë tronditur jo pakë kënd, ku një nënë e dëshmorit, që është sakrifikuar për lirinë e Kosovës po torturohej nga një grup vajzash infermiere që detyrë e kishin kujdesin ndaj saj.
Viktima me inicialet M.N, ishte vendosur në shtëpinë e pleqve në Pejë për arsye se nuk kishte kush të kujdesej për të.
Dhuna dhe tortura ndaj saj është parë si akt çnjerëzor nga figura të ndryshme të politikes dhe jo vetëm.
Për rastin e tmerrshëm kanë reaguar të gjitha institucionet relevante, nga policia e prokuroria, e deri te ministria e Drejtësisë dhe ajo e Mbrojtjes.
Ndërsa për rastin është deklaruar për media, Dorjan Juniku, njëri nga dy prokurorët e rastit për rrahjen të moshuarës në Pejë. Prokurori tha se lidhur me rastin janë arrestuar dy të dyshuara me inicialet A.P., dhe A.R.
Prokurori Juniku tha se ngjarja ka ndodhur sot në qytetin e Pejës.
“Pas pranimit të informacionit të parë lidhur me ngjarjen e cila ka ndodhur sot në qytetin e Pejës, nga kryeprokurori i zyrës Agim Kurmehaj, jemi angazhuar dy prokurorë, ashtu që pas marrjes së autorizimeve kemi vazhduar me të gjitha veprimet ligjore ashtu që në mënyrë shumë të shpejtë bashkë me policinë kemi arritur të arrestojmë dy të dyshuarat me inicialet A.P. dhe A.R., nën dyshimet që kanë kryer veprën penale të sulmit dhe dhënia e ndihmës në kryerjen e veprës penale të sulmit”, tha ai para mediave.
Gjithashtu, Prokuroria ka njoftuar se në këtë çështje ka angazhuar dy prokurorë të shtetit dhe ka autorizuar Policinë e Kosovës që të ndërmerren masat e nevojshme ligjore ndaj personave që kanë kryer këtë vepër penale.
Kujtojmë se për këtë rast policia ka arrestuar dhe ka vendosur masë të paraburgimit për 48 orë ndaj 3 personave.
