Qyteti antik Petra, i ndërtuar në vitet 400 para erës sonë dhe 106 të erës sonë nga Perandoria Nabateane, vizitohet nga turistët që duan të shohin arkitekturën e saj unike
Petra, qendra e rëndësishme turistike e Jordanisë, filloi të zhvillohej si kryeqyteti i nabateanëve, të cilët u pasuruan me tregtinë e temjanit, mirrës dhe erëzave që nga shekulli i parë para erës sonë.
Nabateanët, një fis nomad, ndërtuan Petrën në shkëmbinjtë ranorë të Jordanisë, ndërsa u bë një qytet shumë i pasur dhe i mbushur me njerëz falë tregtisë.
Petra, e cila më vonë kaloi nën sundimin e Romës, vazhdoi rëndësinë e saj edhe në këtë periudhë.
Për arsye të ndryshimit të rrugëve të tregtisë dhe tërmeteve shkatërruese, Petra humbi rëndësinë duke u shndërruar një vend ku kanë jetuar beduinë një periudhë të gjatë.
Petra u rizbulua nga eksploruesi zviceran Johann Ludwig Burckhardt në vitin 1812, duke filluar të njihet gjithnjë e më shumë në botë si një qytet antik magjepsës dhe i bukur.
Qyteti gjithashtu u bë i famshëm edhe si “Trëndafili i Kuq” për shkak të ngjyrës së shkëmbinjve në të cilët ishin gdhendur shumë nga ndërtesat e qytetit.
Qyteti antik, i cili u përfshi në listën e “Trashëgimisë Kulturore Botërore” nga UNESCO më 6 dhjetor 1985, u zgjodh si një nga “Shtatë mrekullitë e reja të botës” më 7 korrik 2007.
Petra është shtëpia e shumë strukturave mahnitëse me strehimore të gdhendura në blloqe shkëmbore, tempuj, varre shkëmbore, kanale uji, teatro, rrugë me kolona dhe diga primitive.
Hyrja në qytetin antik bëhet përmes të çarave të thella shkëmbore me një gjatësi prej 1.200 metrash.
Rrënojat e para të qytetit antik bien në sy pasi të kalohet vendi për shitjen e biletave në sallën moderne të pritjes së vizitorëve në periferi të Wadi Musa. Vizitorët që shkojnë në qytetin antik, ku mund të arrihet duke ecur nëpër male, më pas përballen me hyrjen kryesore 1.200 metra e gjatë.
Shkëmbinjtë e lartë të çarë me gjerësi nga 3 deri në 12 metra në disa vende magjepsin vizitorët me pamjen e tyre. Në të dy anët e këtij kalimi të ngushtë që të çon në Petra, ka kanale për të tërhequr ujin në qytet dhe statuja të ndryshme që simbolizojnë nabateanët.
Kryevepra e Petrës, Al-Khazneh
Fasada dhe kryevepra më madhështore e Petrës, Al-Khazneh, përshëndet vizitorët që kalojnë nëpër shkëmbinj. Al-Khazneh, e cila është rreth 40 metra e lartë, tërheq vëmendjen me kapitelet e saj korintike, figurat dhe dekorimin në formë të ndërlikuar.
Sipas legjendës lokale, Al-Khazneh, që vazhdon misterin e tij, përfshin edhe një vazo funerale, e cila fsheh thesarin e një faraoni. Al-Khazneh tërheq shumë turistë çdo vit me këtë strukturë madhështore.
