Vetëvendosje nuk i bënë ftesë LDK-së për Qeverinë e Re!

Edhe pse mbrëmë pas mesnate Albin Kurti tha se që sot do t’i bëjë ftesë LDK-së për koalicion, kjo ende nuk ka ndodhur, shkruan Gazeta Mejdani

Rezultatet preliminare të zgjedhjeve të së dielës së 6 tetorit, Lëvizjen Vetëvendosje (LVV) janë duke nxjerrë si subjekti politik me më së shumti vota, ku dje kryetari i kësaj lëvizje, Albin Kurti edhe shpalli subjektin e tij si partia e parë fituese.

Kurti menjëherë pas rezultateve preliminare i ka bërë ftesë publike subjektit të dytë politik më të votuar, Lidhjes Demokratike të Kosovës (LDK) si dy partitë opozitare që ishin deri më tani, për të bashkëpunuar për krijimin e qeverisë LVV-LDK.

Por, ftesa publike që u bë dje nga ana e Kurtit ende nuk i është bërë zyrtarisht LDK-së, këtë për Gazetën Blic e konfirmoi, zyrtari për medie i LVV-së, Arlind Manxhuka.

Manxhuka i tha Gazetës Blic se ende ftesa nuk i është bërë për një takim LDK-së, por ai tha se kjo pritet të bëhet së shpejti nga Kurti.“Jo ende nuk i kemi dërguar ftesë, por pritet që së shpejti me i bë një thirrje për takim nga kryetari i lëvizjes”, tha ai.

Manxhuka nuk beson se mund të ketë mes LDK-së dhe PDK-së ndonjë koalicion, por që shprehet optimist se bashkëpunimi mes LVV-së dhe LDK-së do të ndodh.

“Jo, ne shpresojmë dhe besojmë se do të ndodhë, por do të shohim gjatë ditëve në vijim se si do të shkojnë punët, por ne do bëjmë ftesë për takim”, tha ai.Ndërsa, Manxhuka tha se nuk dihet se ftesë kur do të bëhet, por ditëve në vazhdim.

“Së shpejti nuk e dimë saktë se kur, por shumë shpejtë”.