Kryeinspektori i Ministrisë së Infrastrukturës dhe Ambientit, Bedri Halimi, dyshohet se keqpërdori detyrën e tij zyrtare, duke ua lehtësuar ndërtimin e jashtëligjshëm disa kompanive në zonën e Brezovicës.
Në dokumentin e siguruar Halimi dyshohet se ka lejuar ndërtimin e disa hoteleve në Parkun Kombëtar të Sharrit.
Gjatë periudhës 2016-2019, Halimi dyshohet se nuk pengoi ndërtimin e hotelit “Kaona” të bashkëshortes së Sabit Gecit, Sanije Gecit. Po ashtu, ai kishte lejuar ndërtimin e hotelit të kompanisë “Stella Constructing”, me pronar Gentian Suka si dhe aksionar Veton Surroin.
“Ekziston dyshimi i bazuar se nga fillimi i vitit 2016 deri në muajin gusht 2019, si person zyrtar- kryeinspektor në Ministrinë e Mjedisit dhe Planifikimit Hapësinor në Prishtinë, tani MEA, ka keqpërdorur detyrën e tij zyrtare duke mos përmbushur detyrat e tij zyrtare me qëllim të përfitimit të dobisë pasurore për personat e tjerë, në atë mënyrë që nuk ka ndërmarrë veprime për të penguar ndërtimin në Parkun Kombëtar “Sharri” vikend zona e Brezovicës, të objektit hotelier “Rezonanca” me pronar Ramadan Idrizaj, objektit hotelier “Kaona” me pronar Sanije Geci, objektit hotelier “Stella Constructing” me pronar Gentian Sulo, objektit hotelier “Rimida” me pronar Riajd Hasani, 6 vikend-shtëpizave të pronarit Rijad Hasani të cilat janë ndërtuar në kundërshtim me Ligjin për Parkun Kombëtar “Sharri” numër 04/ L-087, Ligjin për Mbrojtjen e Natyrës numër 03/ L- 025 si dhe Ligjin për Ujërat e Kosovës, Ligjin mbi Ndërtimin dhe Planin Hapësinorë për Parkun Kombëtar “Sharri’”, thuhet në kërkesën për paraburgim të Prokurorisë Themelore në Ferizaj.
Tutje, ai dyshohet se në vitin 2020, ka shfuqizuar vendimet e inspektorëve të MMPH-së për t’ua lejuar ndërtimet e kompanive në Parkun Kombëtar “Sharri”.
“Ekziston dyshimi i bazuar se me datë 16 Tetor 2020, si person zyrtar-kryeinspektor i inspektoratit në Ministrinë e Ekonomisë dhe Ambientit në Prishtinë nuk ka përmbushur detyrat e tij zyrtare, me qëllim të përfitimit të dobisë pasurore për persona të tjerë, në mënyrë që në kundërshtim me nenin 44 par. 6 të Ligjit për Inspektoratin e Mjedisit, Ujërave, Natyrës dhe Planifikimit Hapësinor ka nxjerrë aktvendim numër 4779/ 20 të datës 16.10. 2020 me të cilin janë shfuqizuar vendimet e inspektorëve të MMPH-së të datës 26.08.2019, me të…. ishin ndërprerë punimet në objektet ndërtimore- vikend shtëpiza dhe objekteve hoteliereje”, thuhet në dokument.
Kryeprokurori i Prokurorisë së Ferizajt, Shukri Jashari, tha në një konferencë për media të enjten, se shtatë të arrestuarit dyshohen për veprat keqpërdorim i pozitës zyrtare dhe marrje të ryshfetit.
Aksioni i sotëm është vazhdimësi e hetimeve të 21 dhjetorit të vitit 2021, me ç’rast u arrestuan dhjetë persona, përfshirë edhe ish-kryetarin e Komunës së Shtërpcës, Bratisllav Nikolliq, i cili dyshohet për dhënien në mënyrë të kundërligjshme të lejeve të ndërtimit në Brezovicë.
