Gjatë ditës së sotme pritet që të përfundojë obduksioni i pesë trupave të viktimave të familjes Bllaca të cilët dyshohet se u vranë dje nga e bija e tyre, Valdetja e cila më pas vrau edhe vetën.
Kështu ka bërë të ditur për Insajderin, drejtori i Institutit të Mjekësisë Ligjore, Arsim Gërxhaliu.
“Jemi duke punuar. I tëre ekipi është mobilizuar dhe sot pritet të përfundojnë 5 rastet”, ka thënë Gërxhaliu për Insajderin.
Pas kësaj ngjarje tragjike Inspektorati i Policisë ka suspenduar katër zyrtarë të lartë policorë. Të suspenduar janë komandanti i stacionit policor, zëvendësi i tij, shefi i operativës se stacionit policor dhe një zyrtar i stafit civil.
Lajmin për Insajderin e ka konfirmuar edhe Arbër Beka, zëdhënësi për media i Inspektoratit Policor.
“Bazuar në këto veprime hetimore dhe pas konsultave me Prokurorinë Themelore në Gjilan, Inspektorati Policor i Kosovës pas grumbullimit të informacioneve dhe hetimit paraprak në stacionin Policor Gjilan i ka rekomanduar sot Policisë së Kosovës suspendimin e katër punonjësve të PK-së lidhur me këtë rast”.
“Rekomandimi për suspendimin e këtyre zyrtarëve (komandantit të stacionit policor, zëvendës komandantit policor, shefit të operativës të stacionit policor dhe një zyrtari të stafit civil) është bërë në interes të hetimit dhe të njëjtit janë duke u hetuar nga IPK me dyshimin së të njëjtit kanë kryer veprën penale “Keqpërdorim i pozitës apo autoritetit zyrtar”, thuhet në njoftimin e IPK-së.
Valdete Bllaca, ish-police e Kosovës, dyshohet se ka vrarë nënën, babain, dy vëllezërit, dhe më pas edhe veten. E njëjta është konfirmuar se kishte probleme psikike.
Ajo vazhdonte punën aktivisht, ndonëse Inspektorati Policor i kishte rekomanduar Drejtorisë së Përgjithshme të Policisë se pjesëtarët me probleme psikike duhet të suspendoheshin për shkak se ishin të pajisur me armë zjarri dhe mund të paraqesin rrezik.
Papërgjegjësia e Rashit Qalajt për të suspenduar policët me probleme psikike shkaktoi tragjedinë në Gjilan, ku u shua një familje./Gazeta Mejdani/
