Thaçi: FSK-ja sapo është nisur drejt Shqipërisë!

Presidenti i Kosovës, Hashim Thaçi, ka telefonuar kryeministrin shqiptar, Edi Rama.

Presidenti i Kosovës, Hashim Thaçi, e ka telefonuar kryeministrin e Shqipërisë, Edi Rama, dhe është njoftuar më afër për gjendjen pas tërmetit në Shqipëri.

Përmes një postimi në profilin e tij zyrtar në rrjetin social Facebook, presidenti Thaçi, ka bërë të ditur se tashmë njësitë përkatëse të Forcës së Sigurisë së Kosovës janë nisur drejt Shqipërisë, përkatësisht drejt zonave të dëmtuara nga tërmeti.

Postimi i plotë i Thaçit pa ndërhyrje:

Sapo fola me kryeministrin Edi Rama, ku u informova për gjendjen pas tërmetit që goditi Shqipërinë.

Kryeministrit Rama, në emër të qytetarëve të Kosovës i shpreha ngushëllimet më të sinqerta për viktimat që pësuan nga tërmeti.

Kryeministrin Rama e sigurova se Kosova do të jetë në mbështetje dhe përkrah Shqipërisë.

Tashmë njësitë përkatëse të Forcës së Sigurisë së Kosovës janë nisur drejt zonave të dëmtuara nga tërmeti. /Gazeta Mejdani/