Njoftim me shumë rëndësi!
Miq, qytetarë e xhematë po më shkruajnë se njerëz të caktuar po lëshojnë “fetva” që thonë se të votosh Vetëvendosjen është haram me fe. Andaj po kërkojnë mendimin tim në lidhje me rastin.
Nga pozita e studiuesit të fesë islame dhe me përgjegjësinë më të madhe para Allahut dhe ligjit deklaroj:
Lufta mediatike kundër ndryshimit në Kosovë mori përmasa shqetësuese sidomos në dy-tre muajt e fundit. Njerëzit të cilët me çdo kusht duan ta ruajnë gjendjen aktuale, po i përdorin të gjitha mjetet e mundshme për ta ndalë hovin e ndryshimeve. Kjo luftë psikologjike vazhdon edhe sot, pak orë para se të fillojnë votimet.
Ajo që bie në sy si rrezik për shoqërinë tonë, është fakti i hidhur se disa njerëz e disa qarqe po e përdorin (edhe) fenë si mjet frikësimi ndaj qytetarëve që kanë shprehur gatishmërinë për ndryshime. Në fakt, qytetarët mund të justifikohen për shqetësimin që kanë dhe për pyetjet që po i bëjnë. Sepse ata ndoshta nuk janë të informuar sa duhet se feja mbështetë dinamikën, dialektikën dhe ndryshimin. Përtej kësaj, feja në asnjë mënyrë nuk guxon të përdoret si mjet përçarjeje tani kur kërkohet uniteti mes nesh. Në rastin konkret, ajo që shqetëson është pra përpjekja e disave të cilët nga prapaskena të errëta dezinformojnë qytetarin, frikësojnë të rinjtë dhe keqpërdorin fenë për qëllime të ulëta dhe për përfitime personale, partiake dhe klanore. Të tillët po lëshojnë “fetva” të rrejshme se kinse është haram të votohet Vetëvendosja. Këto “fetva” fetarisht janë të paqëndrueshme dhe të ndaluara.
Miq të dashur!
Fillimisht ju porosis të mos i besoni këtyre matrapazëve. Sepse këta mund të dëmtojnë keq shoqërinë dhe shtetin tonë duke i dhënë zgjedhjeve ngjyrime fetare. Duke i hedhur atmosferës së zgjedhjeve mjegull në të cilën pastaj ujqërit bëjnë punën e tyre.
Ju porosis t’i identifikoni këta emra dhe t’i denonconi në polici e prokurori. Tu tregoni organeve të rendit se këta njerëz po përdorin fenë në mënyrën më të shëmtuar të mundshme edhe në çështje politike. Është akt patriotik, pra, sikur edhe obligim fetarë t’i ndalim e t’i demaskojmë njerëzit që tendosin dhe rrezikojnë interesin tonë të përgjithshëm. Njerëzit e këtillë janë të dëmshëm edhe për fenë, sepse fenë e keqpërdorin për t’i mashtruar qytetarët. E kjo vepër e shëmtuar, sipas shumë ajeteve kur’anore është e ndaluar në mënyrë eksplicite.
Gjithashtu, janë disa mashtrues perfidë klasikë që thirren herë në vlera intelektuale, herë kombëtare e herë fetare, por gjithnjë duke i keqpërdorur diplomat dhe pozitat e tyre, e të cilët si gaca të mbuluara na shesin moral e na japin ‘derse’ e ‘nasihate’ nëpër rrjete sociale se si duhet ruajtur shoqërinë dhe vlerat që duhet t’i kultivojmë. Këta njerëz aktivizohen edhe më shumë sidomos para zgjedhjeve. Natyrisht, në mënyrë hipokrite lavdërojnë të tjerët dhe sulmojnë Lëvizjen për ndryshime, programin dhe mbështetësit e saj.
Prandaj, ju bëjë thirrje të mos i përfillni hipokritët. As ata që lëshojnë “fetva” mediatike për interesa të ulëta, e as këta të fundit që janë edhe më të rrezikshëm se të parët.
Ju faleminderit nga zemra për respektin që po tregoni duke më konsultuar, siç edhe ju përgëzoj për shqetësimin që keni ndaj këtyre manipuluesve…!
Ju lutem #Shpërndajeni sa të mundeni…!
