Është ndarë nga jeta të enjten gazetarja dhe këngëtarja e mirënjohur, Violeta Rexhepagiqi.
Ngushëllime për humbjen esaj kanë shprehur emra të njohur të artit, politikës dhe sportit.
Ministrja e Kulturës në detyrë, Vlora Dumoshi, ka dërguar telegram ngushëllimi për humbjen e tashmë të ndjerës, Violeta Rexhepagiqi.
E ndjera Vileta Regjepagiqi
“E nderuara familja Rexhepagiqi,
Me dhimbje e pikëllim të thellë mora lajmin e trishtë për ikjen e hershme të më të dashurës tuaj, e kompozitores, këngëtares e gazetares tonë të njohur, Violeta Rexhepagiqi. Ndarja nga jeta e Violetës është humbje e madhe për ju, por është edhe humbje e madhe për artin dhe kulturën e vendit tonë, të cilës ajo në periudhat më të vështira i dha shumë.
Violeta nuk ishte artiste e zakonshme. Të jashtëzakonshme e bënte përpjekja e saj për të thyer tabutë duke sjellë modernitetin në formën më të mirë të tij, në artin e kulturën tonë. Në kohët më të vështira, me muzikalitetin dhe elegancën e saj skenike Violeta, la gjurmën e pashlyeshme në artin kosovar.
Violeta do të mbahet gjatë në mend krahas kontributit të madh në fushën muzikore edhe për kontributin e çmuar që ka dhënë për fushën e gazetarisë e informimit, në kohën kur Kosova e paraluftës përballej me tortura e burgosje. Violeta Rexhepagiqi ishte udhërrëfyese për artistët e rinj dhe si e tillë do të mbahet mend gjithmonë.
Jemi me fat që e patëm e që e njohëm.
Me respekt,
Vlora Dumoshi
Ministre e Kulturës, Rinisë dhe Sportit”. /Gazeta Mejdani/
