Ka më tepër se tre muaj që punoj në sekularizëm. Përgjatë kësaj kohe si dhe më parë, në katër gjuhë të huaja kam konsulltuar një mori librash e shumë studime e artikuj nga autorë të ndryshëm. Kam shfletuar qindra të tjerë nëpër faqe të internetit. Dhe, natyrisht, jam munduar të gjejë materiale edhe në gjuhën shqipe.
Shkruan: Mustafë Bajrami
Rezultati?
I dhimbshëm dhe i pabesueshëm!
Njëjtë kështu si vitin e kaluar teksa punoja në temën ‘Islami Politik’ (botova dy artikuj në lidhje me te), edhe tani kur po hulumtoja për sekularizmin, para meje u shfaq një tabllo vërtetë e dhimbshme. E pabesueshme. Sepse në gjuhën shqipe studime në këtë fushë thuajse nuk ka fare, e ato që janë, janë tepër amatere. Karikatura. Me përjashtim të ndonjërës sa për të thënë.
Pyes:
Si është e mundur ky popull i yni të jetë kaq të varfër në studime kaq të nevojshme e kaq serioze?
Çka na ka gjetë neve?
Çka bëjnë tërë kohën njerëzit që janë të thirrur të shkruajnë e paguhen për të shkruar; profesorë universitarë, akademikë, studiues nëpër instituteve e intelektualë që marrin paga për të shtruar çështjet në mënyrë të duhur, akademike e me referenca të qëndrueshme?
Lej menjanë laikët e sekularistët që rrejnë se janë të tillë. Që thirren në laicizëm e sekularizëm vetëm kur hapen tema rreth Islamit e muslimanëve. Sa për t’i sulmuar ata e duke dashur t’i nëpërkëmbin para publikut. Por që kurrë asnjëri prej tyre nuk bëri studime që ja vlejnë për atë që thirren në te.
Lej menjanë këta, po pse nuk punojnë bile fetarët, muslimanët që thirren në Islamin e nuk shtrojnë çështje serioze siç janë sekularizmi, laicizmi, raportet e tyre me Islamin, pajtimet e mospatimet mes tyre? Apo, nëse ekziston diçka që quhet sekularzimi islamik, a islami i sekularizuar?
Çka mendojnë këta njerëz?
Islami është vetëm pesë kushtet e tij dhe gjashtë të imanit?
A ka mbetur ndërgjegje në ne shqiptarët apo është tretur fare e jemi shndërruar në robotë të ndryshkur? Pa kujtesë se ia kemi borxh kësaj shoqërie t’ia shpjegojmë gjërat si duhet.
Edhe nëse kush nuk na paguan.
Si është e mundur të kem rënë në këtë gjendje dhe a ka kush që mund t’i zgjojë shqiptarët nga kjo kllapi shkatërrimtare?
Kush e pruri arsimin deri në këtë gjendje e kush e veniti kulturën e të shkruarit tek ne sa të mbesim edhe prapa kombeve më të pa zhvilluarë në botë?
Të turpëruar edhe para fëmijëve tanë e gjeneratave që do të vijnë.
Për sekularizmin gjen informacione në vikipedia më tepër se sa gjithkund tjetër nëpër faqe interneti në gjuhën shqipe. Si është e mundur e gjithë kjo?!
Kjo është e tmerrshme për një shoqëri që thirret në vlera perëndimore, duke mos qenë të vetëdijshëm se në Perëndim janë bërë e bëhen me mijëra studime e artikuj për sekularizmin, për laicizmin, për fenë e religjionin! Ndërsa tek ne, sekularizmi e laicizmi shpjegohen me tri llafe se na qenkan ndarja e shtetit prej fesë apo mosinkorporimi i fesë në çështje të shtetit.
Kaq shkruhet tek ne, ndërsa tek kombet tjera janë bërë me mijëra libra, studime, artikuj e analiza shumë serioze.
Dhe, tema për sekularzimin nuk është i vetmi segment i varfër e i shëmtuar tek ne shqiptarët.
Gjenë edhe shumë e shumë të tjerë.
Pyes edhe një herë:
Çfarë jemi ne e ç’na ka gjetur neve?
