Kosova dhe Serbia po shënojnë fazën e fundit në lidhje me marrëveshjen përfundimtare e cila do të jetë ligjërisht e obligueshme dhe në bazë të letrës së presidentit Donald Trump duhet të përfundon me njohje reciproke mes dy vendeve.
Presidenti i Serbisë, Aleksandar Vucic në medie serbe gjithnjë thotë se nuk do ta njeh pavarësinë e Kosovës, kurse jashtë saj në mediet ndërkombëtare gjithmonë e ripërsërit faktin se nëse Serbia njeh Kosovën atëherë çfarë fitojnë ata dhe se çfarë ju jepet si këmbim i njohjes.
Vucic madje ndonjëherë edhe në Serbi kur flet para deputetëve akuzon opozitën se Kosovën e humbën ata, të cilët dikur ishin në pushtet, në kohën kur Kosova shpalli pavarësinë.
Mirëpo, eksperti amerikan për çështje të Ballkanit, Daniel Serwer ka një paralajmërim për presidentin e Serbisë.
Serbia do të jetë në pozitë të vështirë nëse nuk e njeh Kosovën, ka deklaruar eksperti amerikan dhe se do të ballafaqohet me probleme të vazhdueshme.
“Nëse nuk e njeh Kosovën, kjo do ta vendos Serbinë në pozitë të vështirë. Do të ballafaqohet me problemin e vazhdueshëm që anon nga ana nacionaliste dhe kjo mund të jetë një pengesë për anëtarësimin në BE”, tha Serwer për Al Jazeera Balkans.
Ai shpjegoi se “Vuçiç mund të kërkonte diçka nga BE-ja në këmbim, mbase ai do të kërkonte para nga SHBA, ose ndoshta hyrje më të shpejtë në BE”, shtoi Serwer.
Serwer nuk mendon se shkëmbimi i territorit, i mbrojtur nga ish këshilltari i ngushtë i Trump, John Bolton, është një ide e mirë pas do të çonte në spastrim etnik, jo vetëm në Serbi dhe Kosovë, por gjithashtu në Bosnjë dhe Maqedoni.
