Deputeti i Lëvizjes Vetëvendosje, Rexhep Selimi, ka reaguar ndaj deputetes së AAK-së Teuta Haxhiut, e cila propozoi debat për pensionistët kontributdhënës.
Selimi tha se kufizimet për të përfituar pensionistët kontributdhënës nuk i heq ose nuk i ndërron Kuvendi, por Qeveria, raporton “Zeri.info”.
“Ajo që dua të them, ne si VV jemi që kjo çështje të zgjidhet dhe t’i heq kufizimet për të përfituar pensionistët kontributdhënës. Por kemi të bëjmë me një udhëzim administrativ dhe këtë nuk e ndërron Kuvendi, atë e ndërron dikush në Qeveri, madje ai nuk është kryeministër, mund ta bëjë ministri”, tha ai.
Po ashtu Selimi i tha deputetes Haxhiu që si deputetë të mazhorancës po kërkojnë nga Kuvendi një gjë që nuk është arritur nga qeveria e Haradinajt.
“Një gjë që unë nuk kuptoj, edhe atëherë, edhe sot, deputetët e mazhorancës kërkojnë nga Kuvendi që t’i rekomandoj Qeverisë, të cilët e kanë votuar, e kanë zgjedhur, që i bie se ajo që nuk është arritur nga Haradinaj po kërkohet të bëhet nga Hoti”, deklaroi ai.
Më tej ai iu drejtua deputetes Haxhiu që t’i drejtohet Qeverisë, e cila të bëjë zgjidhje dhe jo Kuvendi.
“Prandaj zonja Haxhiu, drejtojuni Qeverisë suaj, nuk po kuptoj çfarë po kërkoni nga ne, e ke adresën gabuar, nuk është kjo dera që e zgjidh këtë problem. Këtë kërkojani Qeverisë suaj. Nëse doni zgjidhje, e bën Qeveria dhe jo Kuvendi”, tha ai.
