Ministrja e Punëve të Jashtme dhe Diasporës, Meliza Haradinaj ka reaguar pas publikimit të një fotografie nga Komisioneri për Zgjerim të BE’së, Oliver Varhelyi me presidentin serb, Aleksandar Vucic, ku shihet një shkrim “Kosovo i Metohija”.
Haradinaj përmes një shkrimi në rrjetin social Facebook, ka thënë se ky është skandal diplomatik, provokim dhe anim.
“Projeksionet e tilla kanë vdekur, bashkë me regjimin gjenocidal të Millosheviqit.Këtë duhet t’a ketë të qartë çdo tavolinë, e çdo përfaqësues: Republika e Kosovës është një dhe e pacenueshme.”, ka shkruar ajo.
Postimi i plotë:
Është përtej skandalit diplomatik dhe më shumë se provokim dhe anim – pritja e Komisionerit për Zgjerim të BE-së z.Olivér Várhelyi, bërë Vuçiqit me ekspozim të qëllimshëm të librave shovinistë, me emra që janë derivat i projeksioneve për spastrim etnik dhe pretendime territoriale ndaj shteteve tashmë të pavarura dhe sovrane.
Projeksionet e tilla kanë vdekur, bashkë me regjimin gjenocidal të Millosheviqit.
Këtë duhet t’a ketë të qartë çdo tavolinë, e çdo përfaqësues: Republika e Kosovës është një dhe e pacenueshme.
Kosova e 17 Shkurtit nuk preket!.
