Kryeministri i Republikës së Kosovës, Albin Kurti, ka refuzuar t’i komentojë deklaratat e ministrit të qeverisë së tij, Hekuran Murati, të bëra vite më parë për UÇK-në e të cilat ngjallën reagime të shumta e kundërthënëse në opinion.
Sipas Kryeministrit Kurti, komente të tilla nuk mund të jenë prioritet i tij.
“Unë jam kryeministër por jo komentues. Komentues ka pafund. Kryeministri qeveris me vendin për çështje madhore, dhe çka shkruajnë komentuesit për tema të shumë vjetëve nuk mund të jenë temë as prioritet për mua”, ka thënë Kurti.
Sa i përket të pagjeturve, shefi i ekzekutivit tha se do të jetë prioritet i Qeverisë së tij. Tha se gatishmërinë e kanë por që jo gjithçka varet nga ta.
“Padyshim që çështja e të pagjeturve është prioritet për qeverinë. Ata janë të zhdukur me dhunë dhe do të bëjmë maksimumin që kjo çështje të zbardhet sa më parë sepse ankthi i familjarëve është më i madh sesa pikëllimi i tyre që nuk është vetëm i tyre. Ne kemi gatishmëri dhe interesim por nuk varet vetëm nga ne”, tha ai.
