Zëvendësministri i arsimit, Jusuf Thaçi, ka reaguar pas deklaratës së Borrell për aksionin e Policisë së Kosovës në Mitrovicën e Veriut, kundër kontrabandës.
Përmes një postimi në Facebook, ai ka pyetur se a duhet Kosova të koordinohet me BE-në dhe Serbinë për aksione policore për luftimin e krimit dhe kontrabandës.
Thaçi më tej ka pyetur se si Borrell nuk pati asnjë deklaratë për sulmet e serbëve ndaj policisë dhe gazetarëve të Kosovës, derisa ata po e kryenin punën e tyre.
“Qysh??? Për aksione policore në funksion të luftimit të krimit ordiner e kontrabandës, aksione të cilat janë të autorizuara nga prokuroria e gjykatat, po u dashka me u koordinu me BE-në e me Serbinë a? Apo ndoshta duhet me marrë leje prej vet kriminelëve të përfshirë?! A do me thanë kjo, sipas z. Borell, që nëse je serb dhe jeton në veri të Kosovës nuk bën e nuk mund të ndiqesh për krim e kontrabandë?! A nuk pati z. Borell dhe BE-ja me thanë najsen për sulmet ndaj gazetarëve dhe ndaj policisë që u sulmuan në ndërkohë që po po e kryenin punën e vet?! Vërtet qëndrim për keqardhje i z. Borell”, ka shkruar ai.
Përpos kësaj, Thaçi ka bërë edhe një postim tjetër, duke thënë se është kureshtar për qëndrimin e tij dhe të BE-së për sulmin ndaj gazetarëve, nga ana e huliganëve serbë.
“Shumë jam kureshtar me ditë qëndrimin e z. Borell dhe të BE-së në lidhje me sulmin ndaj gazetarëve nga ana e huliganëve serbë. Apo nëse je serb në Kosovë je i përligjur t’i sulmosh edhe gazetarët?!”, ka shkruar Thaçi në Facebook.
