Ministri i Mbrojtjes i Turqisë, Hulusi Akar, tha se qasja e fundit e Kajros zyrtare në Mesdheun Lindor sjell përfitime si për Egjiptin, ashtu edhe për Turqinë dhe vendet e tjera në rajon, raporton Anadolu Agency (AA).
“Është një hap shumë i vlefshëm dhe i rëndësishëm për paqen dhe stabilitetin rajonal që Egjipti respektoi kufijtë e juridiksionit detar të Turqisë të raportuar në Kombet e Bashkuara (OKB)”, tha Akar në një ceremoni ushtarake në provincën jugore Adana.
Gushtin e kaluar, Turqia rifilloi kërkimet e energjisë në Mesdheun Lindor pasi Greqia dhe Egjipti nënshkruan një marrëveshje të diskutueshme të përcaktimit detar, duke prishur gjestin e vullnetit të mirë të Turqisë me ndalimin e kërkimeve.
Më herët gjatë muajit, Akar tha se Turqia e ka në konsideratë angazhimin në një marrëveshje me Egjiptin nën kufijtë e juridiksionit detar që vendi deklaroi në OKB.
Duke folur në lidhje me mbështetjen amerikane për grupin terrorist YPG/PKK, ministri i mbrojtjes tha se SHBA duhet të punojnë me Turqinë, një anëtare e NATO-s, në vend që të bashkëpunojnë me grupin terrorist.
“Ne nuk mendojmë se është e drejtë që SHBA të mbështesin YPG-në, e cila nuk ndryshon nga organizata terroriste PKK, me pretekstin e luftimit të DEASH-it”, tha ai.
Në fushatën e saj terroriste më shumë se 30-vjeçare kundër Turqisë, PKK e renditur si organizatë terroriste nga Turqia, SHBA dhe BE, ka qenë përgjegjëse për vdekjen e 40 mijë personave, përfshirë shumë gra, fëmijë dhe foshnja. YPG është dega siriane e PKK-së.
Në lidhje me bisedimet eksploruese me Greqinë, Akar tha se Turqia do të vazhdojë të zhvillojë bisedime me Greqinë.
“Pavarësisht nga qasja jonë konstruktive, ne gjithashtu hasim në disa deklarata, veprime dhe ngacmime negative”, shtoi ai.
Bisedimet eksploruese midis Turqisë dhe Greqisë për të gjetur zgjidhje të drejtë për çështjet në Egje filluan në vitin 2002. Pas raundit të 60-të në mars 2016, Athina pezulloi bisedimet.
Raundi tjetër i bisedimeve konsultative do të mbahet në Athinë më 16-17 mars dhe do të përqendrohen në mosmarrëveshjet dypalëshe, duke përfshirë kufijtë detarë dhe të drejtat e shpimit në rajon.
