Ndërsa procesi i numërimit në të gjithë vendin vijon, Presidenti Ilir Meta ka reaguar duke kërkuar që të mos tjetërsohet asnjë votë.
Kur rezultatet e deri më tanishme nxjerrin forcë të parë PS në vend, Meta akuzon në Facebook se po bëhet një përzgjedhje për kutitë e votimit që po numërohen, me qëllimin për të demoralizuar rivalët. Ai kërkon ruajtjen e qetësisë deri në shpalljen e rezultateve përfundimtare, duke theksuar se çdo votë në kuti do numërohet dhe rinumërohet deri në fund.
“Asnjë votë të mos tjetërsohet në procesin e numërimit. Numëruesit të mos ndikohen nga përzgjedhjet e qëllimshme të kutive të numërimit për qëllime demoralizimi të rivaleve. Të gjithë të ruajnë qetësinë deri në shpalljen e rezultateve përfundimtare. Çdo votë në kuti do numërohet dhe rinumërohet deri në fund”, shkruan Meta.
Deri më tani, kur janë numëruar 31% e votave PS rezulton forcë e parë duke kryesuar në 9 qarqe dhe duke i marrë demokratëve edhe Dibrën, e ndërsa PD-ja ruan bastionet e saj në Shkodër, Kukës e Lezhë.
