Në stinën e dimrit janë disa patologji të cilat përkeqësohen. Këto patologji janë dermatitet atopike, ekzemat, psoriazis, prurigot senile etj, ku në thelb qëndron lëkura e thatë.
Gjithashtu, në këtë periudhë përkeqësohen disa patologji të indit lidhor dhe autoimune. Temperaturat e ftohta shtojnë vazokonstriksionin (ngushtimin e enëve të gjakut) dhe mungesa e oksigjenimit të indeve i acaron këto patologji. Shprehja më e qartë e tyre janë Pernionet, të njohur në gjuhën popullore si morthi, i cili prek duart, këmbët, pjesën e jashtme të kofshëve dhe shoqeëohet me të kruara, dhimbje dhe në faza të avancuara e të pamjekuara, plagë.
Në këtë periudhë, në Qendrën Spitalore Universitare “Nënë Tereza” është rritur ndjeshëm numri i pacientëve, sidomos të atyre pediatrikë, gjendja e të cilëve përkeqësohet nga faktorët atmosferikë dhe nga pakujdesia në hidratimin e lëkurës.
Si mund të mbrohemi?
Për t’u mbrojtur nga këto patologji, dermatologët rekomandojmë pomada emoliente, të cilat kanë në përbërje të tyre vazelinë dhe glicerinë. Këto produkte bëjnë të mundur mbajtjen e yndyrës dhe ujit në lëkurë duke rregulluar balancën hidrolipidike të saj. Duke u ruajtur kjo lloj balance, lëkura arrin t’i “mbijetojë” të ftohtit. Në rastet e përkeqësimit, pacientët i drejtohen dermatologut për trajtim të specializuar.
