Duka dhe Dukesha e Sussex-it synojnë të tërhiqen nga pozita e “anëtarëve të lartë” të familjes Mbretërore Britanike, transmeton Anadolu Agency (AA).
“Pas shumë muajsh reflektimi dhe diskutime të brendshme, ne kemi zgjedhur të bëjmë një tranzicion këtë vit duke filluar me krijimin e një roli të ri progresiv brenda këtij institucioni”, thuhet në deklaratën e përbashkët të Princit Harry dhe gruas së tij Meghan Markle.
“Ne synojmë të tërhiqemi nga pozita ‘anëtarë të lartë’ të Familjes Mbretërore dhe të punojmë për t’u bërë të pavarur financiarisht, duke vazhduar të mbështesim plotësisht Madhërinë e saj, Mbretëreshën”, shtoi çifti.
Deklarata erdhi pas raportimeve të mediave lokale se çifti do të hiqte dorë nga titujt e tyre mbretërorë dhe do të transferohej në Kanada, një pretendim që nuk u komentua nga Pallati Buckingham.
Në deklaratën e publikuar në rrjetet sociale, çifti tha se ata tani po planifikojnë të balancojnë kohën e tyre midis Mbretërisë së Bashkuar dhe Amerikës së Veriut, si dhe të vazhdojnë të respektojnë detyrën e tyre ndaj Mbretëreshës, Komonuelthit dhe patronazhet e tyre.
Ata thonë se synojnë të krijojnë një entitet të ri bamirës dhe do të ndajnë “detajet e plota të këtij hapi tjetër emocionues në kohën e duhur”.
Deklarata vjen pas një udhëtimi 6-javor në Kanada me djalin e tyre Archie.
Princi Harry është i gjashti në radhë për t’u ngjitur në fronin britanik dhe është martuar me ish-aktoren amerikane Meghan Markle në maj të vitit 2018.
