E ftoj kryeministrin, mikun tim, Edi Rama, që të caktojë ditën dhe datën e heqjes së kufirit dhe çdo barriere kufitare mes shtetit të Kosovës dhe Shqipërisë pa pritur fare opinionet e asnjë vendi fqinj”
Presidenti i Republikës së Kosovës, Hashim Thaçi, ka mbajtur konferencën e fundvitit me gazetarë të martën, në ditën e fundit të vitit 2019 në Presidencë, raporton Anadolu Agency (AA).
Vitin 2019 Thaçi e ka konsideruar si vit me progresivitet brenda vendit, por edhe me procese nëpër të cilat nuk ka pasur përparim të dukshëm.
Në bashkëbisedim me gazetarët, presidenti Thaçi tha se edhe pas tre thirrjeve që ia drejtoi kreut të Lëvizjes Vetëvendosje dhe refuzimeve nga ai, do të takohen në datën që vetë Kurti e ka propozuar, më 6 janar në Presidencë.
I pyetur nga gazetarët për idenë e mini-schengenit ballkanik, Thaçi tha se Kosova nuk është ftuar në takimin e parë të udhëheqësve të shteteve të rajonit, në Novi Sad, gjë që, sipas tij, nuk kanë qenë “të trajtuar si shtet i barabartë”.
Thaçi tha se si rrjedhojë, pas këtij takimi ku Kosova nuk është është ftuar, i ka “refuzuar dy ftesat e tjera të dërguara nga kryeministri Zaev dhe nga kryeministri Rama”.
“Republika e Kosovës, është e gatshme të nënshkruajë marrëveshje bilaterale në kuadër të iniciativave rajonale kurdo, që këto marrëveshje e trajtojnë Kosovën si shtet të pavarur dhe sovran. Në asnjë rrethanë, me asnjë çmim tjetër”, tha Thaçi.
Presidenti Thaçi tha se e vlerëson qëndrimin e kryeministrit shqiptar Edi Rama që është i gatshëm për marrjen e vendimit të heqjes së të gjitha barrierave apo heqjen e kufirit dhe doganës mes Kosovës dhe Shqipërisë. Për këtë, Thaçi tha se “vlerëson guximin qytetar, politik dhe atdhetar të kryeministrit Rama”.
“Duke respektuar përgjegjësitë e mia kushtetuese dhe ligjore dhe aspiratat, por edhe vendosmërinë e qëndrimin tim, sepse ne nuk kemi nevojë fare për kufij mes Kosovës dhe Shqipërisë, nuk kemi nevojë për asnjë barrierë, unë, edhe njëherë, e ftoj kryeministrin, mikun tim, Edi Rama, që të caktojë ditën dhe datën e heqjes së kufirit dhe çdo barriere kufitare mes shtetit të Kosovës dhe Shqipërisë pa pritur fare opinionet e asnjë vendi fqinj. Ne jemi sovran, jemi dy shtete të pavarura”, theksoi Thaçi.
I pyetur nga AA se a mendon që viti 2020 do të jetë vit i rinisjes së dialogut dhe përmbylljes së këtij procesi, Thaçi tha se beson që viti i ri do të jetë vit ku do të zhbllokohen rrethanat e krijuara në këtë proces dhe do të “ketë vazhdim apo fillim të një procesi të ri politik, të dialogut”.
Kjo zgjidhje, sipas Thaçit, mund të rrisë shpresën te qytetarët e vendit për një marrëveshje eventuale midis Kosovës dhe Serbisë.
Presidenti i vendit Hashim Thaçi tha se sa i përket karrierës së tij politike, ai nuk e ka problem që edhe pas përfundimit të mandatit të presidentit të vazhdojë me angazhime të tjera jashtë politikës, por për këtë tha se ka kohë ende dhe “zgjedhja e presidentit kërkon dy të tretat e votave të deputetëve të Kuvendit”.
