Pas sulmeve të Iranit ndaj bazave amerikane në Irak Presidenti i Shteteve të Bashkuara të Amerikës (ShBA) Donald Trump, tha që gjithçka është në rregull.
Presidenti Trump u prononcua nëpërmjet llogarisë së tij në median sociale Twitter.
Trump, i cili pas sulmit zhvilloi një takim me Këshillin e Sigurisë Kombëtare në Shtëpinë e Bardhë, në postimin e tij u përpoq të paraqet një qëndrim të qetë.
Duke deklaruar se do të bëjë një deklaratë në mëngjes Presidenti Trump tha: “Çdo gjë është në rregull. Raketat e hedhura nga Irani në objektiv morën 2 baza ushtarake. Aktualisht po zhvillohen punimet për përcaktimin e humbjeve dhe dëmeve. Ne kemi ushtrinë më të fortë dhe më të pajisur në botë”.
Nga ana tjetër Administrata Federale e Aviacionit Civilë Amerikan njoftoi se për shkak të “situatës emergjente” ka ndaluar fluturimet për avionët civilë amerikanë në rajonet e Iranit, Irakut, Gjirit të Iranit dhe Gjirit të Omanit.
Duke iu referuar tensionit në rritje midis ShBA-së dhe Iranit dhe sulmeve të fundit raketore të Iranit, institucioni në fjalë tha se aktivitetet e aviacionit civil në rajon mund të marrin një dimension të rrezikshëm dhe se ata i ndjekin nga afër zhvillimet në rajon.
Në një deklaratë të shkruar të lëshuar nga Ushtria e Gardës Revolucionare e Iranit thuhet se në kuadër të “operacionit të hakmarrjes” për vrasjen e gjeneralit iranian Qasem Soleimani, baza ajrore amerikane Ayn Al-Asad në Irak është goditur me dhjetëra raketa balistike tokë-tokë.
