Policia e Kosovës në veri të vendit nuk e ka respektuar vendimin e qeverisë së Kosovës që lejon gazetarët dhe punëtorët e mediave të lëvizin lirshëm gjatë orës policore. Sot, në Mitrovicën e Veriut është arrestuar redaktorja e portalit Kossev Tatjana Llazareviq.
Lajmin për arrestimin e saj ka konfirmuar për KosovaPress zëdhënësi i i policisë për rajonin e veriut, Branisllav Radoviq.
“Gazetarja është arrestuar për shkak të mos respektimit të masës së kufizimit të lëvizjes”, ka thënë shkurt Radoviq.
Redaktorja e portalit që është arrestuar mësohet se gjendet aktualisht në stacionin e policisë në veri.
Vendimi i qeverisë për kufizimin e lëvizjes nuk përfshinë gazetarët dhe punëtorët tjerë të medias të cilët duhet të kenë kartën e identifikimit me vete gjatë aktivitetit profesional.
Këtë e ka konfirmuar edhe zëdhënësi i qeverisë, Përparim Kryeziu kur është marrë vendimi i qeverisë për kufizimin e lëvizjes së lirë.
“Komuniteti i mediave, gazetarët dhe ekipi përcjellës, mund të vazhdojnë veprimtarinë e tyre në mënyrë të rregullt, në përputhje me urdhëresat të cilat tashmë janë në fuqi. Gazetarët, kameramanët, fotoreporterë dhe punetorët medial duhet që gjatë gjithë kohës të mbajnë me vete I.D. e tyre të punës, të cilat dëshmojnë angazhimin e tyre profesional. Gjithashtu, udhëtimin e tyre gjatë përcjelljeve të ngjarjeve në teren, ta bëjnë me vetura zyrtare dhe të regjistruara si pronë e mediumit ku ata punojnë”, ka thënë Përparim Kryeziu, zëdhënës për media në Qeverinë e Kosovës.
Ndërkaq, Zyrtari i Qeverisë së Serbisë, Marko Gjuric, ka thënë se Shteti serb ka vendosur ndalimin e gjithë qarkullimit për vikend në dy komunat e Republikës së Kosovës.
Sipas vendimit të Qeverisë serbe në Mitrovicën e Veriut dhe në Zveçan s’do të lejohet fare të ketë lëvizje gjatë vikendeve, shkruan Express.
“Nga 10 prilli është vendosur ndalim ditor i trafikut nga ora 12:00-06:00 në komunat e Mitrovicës së Veriut dhe Zveçanit për 14 ditët e ardhshme. Gjatë fundjavave është vendosur ndalim i përgjithshëm i trafikut”, ka njoftuar Gjuric, në një postim në instagram.
