Anija turke për kërkime sizmike Oruç Reis do të vazhdojë deri më 27 gusht punimet e saj për kërkime të hidrokarbureve në brigjet e Qipros.
Bëhet e ditur se një Navtex i ri është shpallur ku thuhet se punimet do të vazhdojnë në zonën në të cilën anija Oruç Reis do të vazhdojë punimet sizmike.
Në një njoftim të bërë më parë afati i punimeve ishte njoftuar deri më datën 23 gusht ndërkohë me njoftimin e ri ky afat është zgjatur edhe për 4 ditë.
Sipas kësaj Oruç Reis, bashkë me anijet Ataman dhe Cengiz Han do të kryejnë punimet sizmike në zonat e shpallura më parë në brigjet e Qipros në Mesdheun Lindor.
Anija kërkimore sizmike Oruç Reis mund të kryejë të gjitha llojet e kërkimeve gjeologjike, gjeofizike, hidrografike dhe oqeanografike, veçanërisht për kërkimet e shelfeve kontinentale dhe burimeve natyrale.
Në anijen e cila është një nga anijet e rralla në botë e pajisur plotësisht dhe me shumë qëllime, mund të kryhen kërkime sizmike 2 dhe 3 dimensionale, kërkime të gravitetit, gjeofizike në mënyrë manjetike. Anija mund të kryejë operacione sizmike 3 dimensionale deri në 8 mijë metra dhe dy-dimensionale deri në një thellësi 15 mijë metra.
Për më tepër, raporton AA, Turqia ka njoftuar se anija e saj e shpimit Yavuz do të vazhdojë punimet për kërkimin e hidrokarbureve në brigjet e Qipros.
Për punimet që do të zhvillojë anija e shpimit Yavuz, Turqia njoftoi se ka shpallur një Navtex të ri (njoftim për detarët) për periudhën 18 gusht – 15 shtator në zonën e punimeve.
Sipas kësaj anija Yavuz bashkë me anijet Ertuğrul Bey, Osman Bey dhe Orhan Bey do të vazhdojë punimet në Mesdheun Lindor në jugperëndim të Qipros.
Në njoftimin Navtex thuhet se “Rekomandohet fuqimisht që të mos hyhet në zonën e punimeve”.
Pasi Turqia shpalli Navtex për anijen Yavuz, administrata e Qipros greke mëngjesin e sotëm publikoi një “kundër-Navtex”.
Sipas radios qipriote-greke, administrata e Qipros greke me “kundër-Navtex-in” e publikuar nga “Qendra e Koordinimit të Kërkim-Shpëtimit” në Larnaca ka pretenduar se Navtex-i i ri i Turqisë është “i pa-autorizuar dhe i pavlefshëm dhe se aktivitetet e anijes Yavuz dhe anijeve të tjera në rajon janë të paligjshme”.
