Në vazhdën e takimeve me partitë politike, kandidati për kryeministër, Albin Kurti dhe u.d e presidentes, Vjosa Osmani, janë takuar me liderin e partisë së goranëve të Kosovës, Adem Hoxha.
Hoxha pas takimit ka thënë se kishte një bisedë konstruktive me Kurtin e Osmanin, por nuk ka treguar nëse do ta votojë Qeverinë e re.
“Sot ishim në takim me kryeministrin dhe presidenten e ardhshme. Biseda ishte konstruktive. Ne si përfaqësues të popullit goran angazhohemi për një shoqëri multietnike në Kosovë. Ne nuk e shohim bllokadën si zgjidhje politike të problemeve.
Ne kemi kërkesat tona minimale në favor të barazpeshës politike. Fati i çdo gorani është që kur mbush 18 vjet ikë në gurbet. Unë shpresoj që do të kemi mirëkuptim me presidenten dhe kryeministrin dhe do të jemi bashkë në këtë rrugë”, u shpreh ai para gazetarëve.
