Partia Demokratike e Kosovës ka reaguar pas deklaratave të kryetares së Kuvendit, Vjosa Osmani, e cila sot pas mbledhjes së Kryesisë deklaroi se PDK që nga 3 shkurti po e bojkoton Kuvendin.
Këto deklarata të Osmanit, partia më e madhe opozitare i quan gënjeshtra, duke theksuar se bojkotin e kanë bërë ndaj saj e jo ndaj Kuvendit.
“Znj. Osmani, jo bojkot Kuvendit, por bojkot ty! Vjosa Osmani edhe sot gënjeu publikisht para gazetarëve se PDK po e bojkoton Kuvendin nga data 3 shkurt kur u votua Qeveria. Kjo nuk është e vërtetë. As që do të ketë bojkot, siç do ajo. Bojkoti është për të dhe manipulimet e saja për të mekanizuar për lojëra të veta politike, institucionin më të lartë të vendit”, thuhet në komunikatën për media të lëshuar nga PDK.
“Të gjithë qytetarët e kanë ndjekur seancën më 3 shkurt dhe deputetët e PDK-së ishin aty, madje të gjithë kanë diskutuar në atë seancë. Ndërsa, deputetët e PDK-së nuk kanë pasur mundësi të marrin pjesë në seancën tjetër të asaj dite për zgjedhjen e kryetarit të Kuvendit, sepse ajo ishte seancë klandestine. Deputetët e PDK-së janë njoftuar vetëm 5 minuta para asaj ‘seance’. Fare qartë u pa se ajo ishte seancë e përjashtimit tonë, për të mos pasur mundësi të marr pjesë opozita në të”, thuhet më tej në komunikatë.
Sipas kësaj partie, qëllimi i qartë i kësaj “loje të rrezikshme” ishte “frika nga ballafaqimi me transparencën e shkarkimit të një kryetari Parlamenti dhe zgjedhja e një kryetari të ri si znj. Osmani, në rrethana më të paqarta politike dhe flirtim të rrezikshëm politik me Beogradin, përkatësisht Listën Serbe”.
“Atë natë u shtjellua një precedan i rrezikshëm: Koalicioni me Beogradin dhe Listën Serbe i padeklaruar, do të mbajë të gjallë këtë qeveri dhe këtë pseudokryetare Kuvendi, e cila me çdo kusht synon të nxjerr jashtë Kuvendit udhëheqësin e opozitës!!!”, deklaron PDK-ja në këtë komunikatë.
Partia Demokratike ka sqaruar po ashtu se në seancën e dytë të Kuvendit më 3 shkurt, ku u votua për kryetarin e ri të Kuvendit, nuk kanë marrë pjesë as deputetët tjerë opozitarë por edhe disa nga pozita sepse nuk ishin ftuar me kohë.
Kjo parti kërkon nga kryetarja e Kuvendit, Vjosa Osmani, “të kryejë obligimin ligjor, të kthejë fotot e Presidentit dhe Adem Jasharit në vendin e vet”.
“Po ashtu, të mbajë foton e ish-presidentit Rugova në kabinet dhe të luajë rolin e vet kushtetues si spikere e Kuvendit, siç duhet ta ketë! PDK si lidere e opozitës nuk do të merret me znj. Osmani por me oponentët tanë politikë. Por, ajo duhet ta kuptojë se do të bojkotohet derisa të ndalojë shkeljet ligjore në institucionin e Kuvendit”, përfundon komunikata e PDK-së.
