E vetmja marrëveshje të cilën Kisha Ortodokse e Serbisë e pranon është ajo në të cilën Kosova mbetet nën përbërjen e Serbisë, ka thënë Patriarku Irinej derisa komentonte negociatat e zhvilluara ditëve të fundit. Patriarku Irinej rriti presionin ndaj Presidentit serb Vucic kur përmendi edhe gatishmërinë e pjesëmarrjes në bisedime nëse dikush i fton.
“Ky është qëndrimi absolut i Kishës e në të nuk ka ndryshuar asgjë. Ende po shikojmë se në cilin drejtim po shkojnë negociatat mes palës serbe e shqiptare, ende po njoftohemi me lëndën” tha ai për portalin serb Nova.rs, ku shtoi edhe madje se nëse vjen deri tek ftesa, ata do të përfshiheshin në negociata rreth Kosovës.
“Nëse dikush na fton dhe na jep rastin, ne do të përfshiheshim në bisedime rreth Kosovës. Në të kundërtën gjithsesi do t’i ndjekim sesi po ecën procesi i negociatave” tha Irineji.
Sipas Irinejit përfaqësuesit e Kishës Serbe presin që të shohin marrëveshjen e plotë, si ai personalisht dhe Kisha, mbështesin idenë që të normalizohen marrëdhëniet mes shqiptarëve dhe serbëve.
“Kjo do të ishte normale. Është domosdoshme të vendoset marrëdhënie mes këtyre dy popujve” porositi patriarku Irinej.
Më parë për agjencinë serbe të lajmeve Tanjug kishte thënë se ai nuk është i njoftuar mirë me detajet e marrëveshjes së arritur nga Presidenti i Serbisë, Aleksandar Vucic, jo shumë kohë më parë në Washington, që kanë të bëjnë me Kishën, që ai të mund të vlerësoj nëse ajo do mbronte trashëgiminë serbe religjioze, pronën, klerit dhe besimtarëve.
