Zëdhënësi i Bashkimit Europian, Peter Stano ka deklaruar se Përfaqësuesi i Lartë për Politikë të Jashtme dhe Siguri i BE-së, Josep Borrell ka ftuar në takim në Bruksel kryeministrin e Kosovës, Albin Kurtin dhe presidentin e Serbisë, Aleksander Vuçiq.
Kjo ftesë e Borrell vjen pas takimit që ky i fundit pati me Sekretarin Amerikan të Shtetit, Anthony Blinken dhe pas tensioneve të krijuara në veri të Kosovës që pasuan nga një aksion kundër krimit të organizuar nga policia e Kosovës.
Stano në një konferencë për media ka thënë Borrell i ka telefonuar Kurtin dhe Vuçiqin duke ua theksuar nevojën e domosdoshme për dialog.
“Mund të konfirmoj se Përfaqësuesi i Lartë i BE-së, Josep Borell në bisedimet me sekretarin Blinken ka ngritur çështjen e asaj se çfarë po ndodh aktualisht në Kosovë. BE-ja dhe ShBA-ja janë duke punuar ngushtë për Ballkanin Perëndimor dhe kemi objektivat e njëjta. Borell gjatë qëndrimit të tij në SHBA ka biseduar me kryeministrin Kurti dhe presidentin Vuçiq sa i përket situatës dhe ka përsëritur nevojën që të shkohet në Bruksel për të diskutuar në korrnizën e dialogut, për të avancuar dialogun dhe për të arritur progres në dialog në mënyrë që të evitohen situatat e njëjta që i pamë në veri të Kosovës së fundi dhe mes Kosovës dhe Serbisë”, tha Stano.
Në anën tjetër, nuk dihet ende se kur do të jetë takimi i radhës i nivelit të lartë mes Kurtit dhe Vuçiqit.
Deri më tani, takimet midis dy liderëve nuk kanë sjellë ndonjë rezultat konkret ndërsa Bashkësia Ndërkombëtare vazhdimisht ka theksuar nevojën e përfundimit të dialogut me njohje reciproke.
