Kryetari në largim dhe ish-kandidati i AAK’së për kryetar të Junikut, Agron Kuçi ka dhënë dorëheqje nga pozita e kryetarit të Degës së AAK’së në Junik, pas humbjes që ka pësuar në zgjedhjet e 14 nëntorit.
Me anë të një postimi në Facebook, Kuçi ka falënderuar votuesit e tij si dhe strukturat e AAK’së për angazhimin në zgjedhjet lokale.
Ai ka thënë se ndaj tij dhe familjes u bë një fushate të egër e linçuese.
“Rezultati i publikuar nga KQZ, tregon që ne nuk kemi fituar në garën për kryetar të Junikut. Ndaj, unë edhe njëherë dua t’i falenderoj nga zemra të gjitha strukturat drejtuese të Aleancës për punën dhe angazhimin e jashtëzakonshëm, aktivistët e simpatizantët tonë besnik, dhe gjithë qytetarët junikas, për kulturën e lartë dhe maturinë e treguar përballë një fushate të egër e linçuese ndaj meje dhe familjes sime. Koha ka për të dëshmuar këtë. Faleminderit që na besuat votën tuaj, duke na konfirmuar edhe kësaj radhe si partia e parë në Junik, përkundër rezultatit në balotazh, të kampit rival, që ishin tri parti në koalicion të përbashkët (LDK, VV dhe PDK) përballë nesh, si parti e vetme”, ka shkruar ai.
Tutje ai ka thënë se jep dorëheqje të parevokueshme nga pozita e kryetarit të Degës së AAK’së.
“Rezultati në zgjedhje, ekskluzivisht është përgjegjësi e imja dhe e askujt tjetër prandaj i vetëdijshëm për këtë, unë jap dorëheqje të parevokueshme nga pozita e kryetarit të Degës së AAK- së, me qëllimin më të mirë që Dega të drejtohet nga një frymë e Re, e që jam i bindur se Degës sonë në Junik nuk i mungon, përkundrazi potenciali që e kemi ngritur bashkarisht është shumë i madh dhe qëndron në lartësinë e duhur”, ka shkruar Kuçi.
