Përplasje mes kryeministrit, Albin Kurti, dhe deputetëve opozitarë ka prodhuar interpelanca e thirrur nga AAK-ja, por jo edhe një dakordim politik për sjelljen që duhet treguar ndaj serbëve të Kosovës e edhe ndaj Serbisë në dialog.
Kryetari i AAK-së, Ramush Haradinaj e arsyetoi mocionin dhe sponsorizoi një projektrezolutë, por shprehu mospajtim me kryeministrin.
“Nëse vazhdon me demagogji as opozita s’ka me mujt me të ndihmu, as Zoti”, ka theksuar Haradinaj.
Por, për kryeministrin veprimet e Qeverisë së tij ia kanë kthyer kahun dialogut me Serbinë.
“Sikur të ishim në qeveritë e kaluara kur vareshin nga Lista Serbe me veprimet që po i bëjmë ne sigurisht do të kishte mocion mosbesimi për ta rrëzuar Qeverinë, por ja që tani nuk është e mundshme”, ka theksuar Kurti.
Deputetë të PDK-së që ka udhëhequr më së shumti me procesin e dialogut, e kritikuan Qeverinë për zhvillimet që rezultuan me braktisjen e institucioneve nga serbët e veriut.
“Data e 4-5 nëntorit është data më e keqe e historisë moderne të shtetit të Kosovës. Krejt çka është ndërtuar nga pavarësia është shembur”, ka deklaruar deputeti i PDK-së, Enver Hoxhaj.
Ai tha se seanca për dialogun do të duhej të ishte e mbyllur për publikun. Për këtë foli edhe kryeministri Kurti, tek iu përgjigjur shefit të Grupit parlamentar të PDK-së, Abelard Tahiri.
“Është hera e parë që prej pavarësisë që kryeministri ka përballë një opozitë konstruktive kur vjen puna me Serbinë”, ka deklaruar Tahiri.
Atij i është përgjigjur Kurti.
“Pajtohem me deputetin Enver Hoxhaj që kërkoi seancë të mbyllur kur ke deputetë që flasin aq palidhje”, ka theksuar Kurti.
Kurti pati një përplasje verbale edhe me shefin e deputetëve të LDK-së,
Arben Gashi.
“Dialogu, dialogu, dialogu, Serbia, tap në pozitë të kryeministrit, dialog. S’ka dialog S’ka dialog, direkt e në dialog”, ka theksuar Gashi.
Kurti i është përgjigjur duke thënë se “ në marrëveshjen e VLAN-it ne themi jemi për dialog parimor për herë të parë si Vetëvendosje dhe në atë pikë thuhet që Vetëvendosje ta udhëheqë dialogun”.
Ndërsa Gashi ka deklaruar se LDK-ja ka dhënë kondtibur në edukimin e Kurtit.
“Që LDK-ja ka dhënë kontribut në edukimin e kryeministrit pajtohem, edhe në marrëveshjen që e kemi nënshkruar bashkë por edhe në bashkëqeverisjen që e kemi pasur”, ka theksuar Gashi.
Ndonëse diskutimi vazhdoi, interes për interpelancën nuk tregoi edhe më tej LDK-ja.
Këtë e ka komentuar Kurti. “Por sot e di që asnjë deputet i LDK-së nuk është këtu. Na trego strategjinë platformën më thanë, unë po flas por ata nuk janë këtu. Duhet ta themi troç se deputetët që nuk janë në sallë po ju ec rroga dhe deputetët e kanë pagën më të lartë se kryeministri”, ka theksuar Kurti.
AAK-ja qëndroi në sallë. Ndonëse e inicioi interpelancën, e pati kohën më të shkurtër për diskutim. Por për ta shfrytëzuar atë me kujdes, kryetari i Kuvendit ua dha një rekomandim.
“Pal mos u var nga letra, mundohu me e thanë me fjalë tuat”, ka theksuar Konjufca.
Diskutimi gati triorësh, u përmbyll pa miratim të projekt-rezolutës që kërkonte dialog intensiv me serbët e Kosovës për t’i kthyer në institucione, komunikim me opozitën për rrugëdalje nga situata e krijuar dhe një samit disaditor në SHBA për përmbylljen e marrëveshjes finale me njohje Kosovë-Serbi.
