Policët e Kosovës që nga fillimi i pandemisë COVID-19 kanë punuar me orar të zgjatur, me qëllim të realizimit të detyrave dhe përgjegjësive të tyre ligjore, si dhe zbatimin e vendimeve të Qeverisë së Kosovës, shkruan “Zëri”.
Që nga shfaqja e rastit të parë me koronavirus në Kosovë e deri tani shtatë zyrtarë policorë janë infektuar me koronavirus.
Policia e Kosovës e ka konfirmuar për “Zërin” se që të shtatë zyrtarët policorë janë në vetizolim.
“Deri më tani janë 7 raste që zyrtarët policorë kanë rezultuar pozitivë me virus. Një rast në Malishevë, zyrtari ka qenë i liruar nga puna, në pushim, si rast i veçantë shëndetësor dhe nuk ka pasur kontakt me ndonjë zyrtar policor (gjendet në vetëkarantinë). Një rast në rajonin e Prishtinës, vizitë studimore në Londër dhe falë syçëltësisë dhe komunikimit me DSHSH-në menjëherë është vendosur në vetëkarantinë, duke mos rrezikuar aspak të tjerët, (gjendet në vetëkarantinë). Pesë raste në veri të Mitrovicës – zyrtarët janë duke u monitoruar (gjenden në karantinë)”, thuhet në përgjigjen dërguar “Zërit”.
Policia ka deklaruar se zyrtarët policorë janë në gjendje stabile dhe të vetizoluar.
“Disa zyrtarë, që janë sugjeruar për vetizolim dhe për izolim i detyruar, ka ardhur me rekomandim të ekipeve mjekësore nëpër pikat kufitare, (pas ardhjes së tyre nga vende të ndryshme, si ; Zvicër, Londër, Serbi, Amerikë, Gjermani etj.), ku tani numri më i madh i tyre është liruar nga vetizolimi. Çdonjëri prej tyre ka udhëzimet nga Instituti Kombëtar i Shëndetit Publik dhe nga ekipet mjekësore”, kanë deklaruar ata.
PK-ja gjithashtu ka deklaruar se policët me probleme shëndetësore kanë qëndruar në shtëpi.
“Sa u përket zyrtarëve të tjerë policorë me sëmundje përcjellëse, si: diabet, sëmundje malinje, sëmundje të zemrës, të sistemit respirator etj., asnjeri nuk është prekur nga COVID-19, sepse DSHSH-ja i ka përkrahur, duke u rekomanduar qëndrim në shtëpi. Një numër i zyrtarëve policorë, të cilët kanë sëmundje të rënda dhe një pjesë e stafit civil janë liruar, përderisa një pjesë e tyre, sipas nevojës, kryejnë detyra administrative përmes pajisjeve elektronike”, potencoi Policia.
Policia thotë se janë duke zbatuar të gjitha vendimet e institucioneve të Kosovës, duke punuar me orar të zgjatur.
“Policia e Kosovës po vazhdon punën e saj me orare të zgjatura, me qëllim të realizimit të detyrave dhe përgjegjësive të saj ligjore, si dhe zbatimin e vendimeve të Qeverisë së Republikës së Kosovës”, përfunduan ata./Gazeta Mejdani/
