Kryetari i Komunës së Prizrenit Mytaher Haskuka, i prekur thellë me situatën e krijuar në Shqipëri pas tërmetit, është shprehur se jetët që mori dhe vuajtjet që solli kjo fatkeqësi, do të tejkalohen më lehtë duke qenë së bashku, shkruan KosovaPost.
I lënduar e i dëshpëruar nga situata në Shqipëri, Haskuka ndihet i motivuar e merr kurajo, derisa sheh mobilizimin e lartë të qytetarëve prizrenas për të ndihmuar vëllezërit të prekur nga tërmeti.
Ai përmes një statusi në Facebook, ka kujtuar dhimbjen dhe trishtimin që po përjetojnë gjithë shqiptarët, ndërsa ka shtuar se ndihet krenar me reagimin e shpejtë të prizrenasve për tu mobilizuar dhe ofruar ndihmë për të mbijetuarit e tërmetit.
Sipas tij, përveç ndihmës institucionale që Prizreni ka bërë për qytetarët e prekur nga tërmeti, janë edhe qytetarët pa dallim, ata që mblodhën ndihma në ushqim e veshmbathje, për banorët e zonave më të prekura.
Postimi i plotë i Haskukajt në Facebook:
Tronditje, dhimbje por edhe krenari e madhe. Mobilizim i jashtëzakonshëm për një kohë të shkurtë.
Sot pas lajmit për tërmetin, viktimat dhe të lënduarit në Shqipëri, fillova të marr telefonata nga qytetarët të cilët donin të ofronin ndihma.
Në të njëjtën kohë pasi që tërmeti ishte ndier fuqishëm edhe në Prizren, në mënyrë urgjente organizuam një takimit me të gjitha institucionet relevante të sigurisë në Komunën e Prizrenit për ngritjen e gatishmërisë për situata emergjente.
Pas takimit një ekip i stafit mjekësor i urgjencës me autoambulancë u nis për në Durrës bashkë me materiale për intervenim të shpejtë nga Drejtoria e Shëndetësisë. Tanimë ekipi është në Stadiumin e Durrësit duke ofruar shërbimet mjekësore emergjente qytetarëve në nevojë.
Si Komunë e Prizrenit po ashtu kemi vënë në dispozicion një brigadë zjarrfikësish dhe pas konsultimeve me ambasadorin Minxhozi kemi marr vendim që të përgatisim pako ushqimore dhe batanije për zonat e prekura nga tërmeti që do të nisen në ditët në vijim.
Në ndërkohë Lëvizja VETËVENDOSJE!, grupi i tifozëve Arpaxhik’t dhe shoqëria civile kishin filluar grumbullimin e ndihmave me ushqim dhe veshmbathje, si dhe në këto momente dy kamionë dhe një autobus nga Prizreni tanimë janë nisur drejt rrugës së kombit për në Durrës.
Po ashtu njoftojmë që Drejtoria e Mirëqenies Sociale do të vazhdojë grumbullimin e ndihmave në Qendrën për Punë Sociale edhe nesër.
Në ndërkohë shumë qytetarë që janë lajmëruar për të ofruar shtëpitë e tyre në rast nevoje për t’i strehuar vëllezërit tanë nga Shqipëria.
Falënderoj të gjithë qytetarët për shpejtësinë e reagimin dhe nivelin e lartë të solidaritetit!
Ditët e vështira si kjo, sot na konfirmojnë se bashkë e kemi më lehtë, bashkë e bëjmë më mirë.
Discussion about this post