Vazhdimisht po shtohen zërat në lidhje me themelimin e Gjykatës Speciale. Thujase të gjithë e kanë parë se sa gabim të madh bëri politika kosovare me atë vendim.
Mustafë Bajrami ka kritikuar ashpër të gjithë ata që sot janë ngritur kundër punës së kësaj gjykate, ndërsa deri dje ishin pro themelimit të saj.
Ai i ka quajtur “fjalë boshe” e hipokrizi” përpjekjet e këtyre njerëzve që po flasin kundër Gjykatës Speciale.
Mo poshtë gjeni shkrimin e tij të plotë:
Tanimë të gjithë po e shohin dhe po e kuptojnë se votimi i Gjykatës Speciale paskësh qenë hap totalisht i gabuar.
Po e shohin edhe ata që thonin se po nuk e themeluam ne, do ta bëjë Rusia, sikur po e shohin edhe të tjerët që thonin se, megjithëqë ish-Presidenti Thaçi e dinte se do të shkojë edhe vetë në Hagë, ai e bëri këtë për hirë të Kosovës. Me demek, për ta shpëtuar Kosovën!
Edhe pse më është bërë tepër vonë dhe pa kurfarë efekti, të gjithë janë duke e parë se politika kosovare u tregua e paaftë për ta “nuhatur” këtë gabim katastrofik të pafalshëm.
Në atë kohë, jo vetëm që kam qenë kundër, por kisha bërë disa shkrime kundër këtij vendimi, ndërsa në ditën kur duhej të votohej, iu pata drejtuar deputetëve të Kosovës me një Letër të Hapur ku pata radhitur rreziqet dhe pasojat që do të sjellë votimi i asaj Gjykate.
Lehtë është sot të gjenden arsyetime siç po po bëjnë disa të cilët na konsideronin të padijshëm e të paaftë sa ta kuptojnë politikën. Lehtë është të tregohesh sot analist duke i rradhitur lëshimet e të këqijat e njëpasnjëshme, por është tepër vështirë, thuajse e pamundur më të përmirësohet ky gabim.
Disa herë e kam përsëritur: Themelimi i Gjykatës Speciale në mënyrën si u bë, është një prej gabimeve më të mëdha që i ka bërë politika kosovare që nga paslufta.
E tash, shikoni sa shumë përpjekje bëhen për ta tejkaluar këtë gjendje. Për ta zhbërë një gabim që nuk do të duhej të bëhej. Shikoni sa fjalë boshe thuhen sot e sa analiza banale i dëgjojmë kinse në mbrojtje të “hakut” tonë. Kinse për hir të atyre që po mbahen të robëruar në Hagë, e kinse po mundohen të bëjnë diçka për të mirën e përgjithshme të vendit tonë.
Fjalë boshe janë këto. Janë hipokrizi të kulluara.
NOT: Kur nuk e dëgjon e as përfillë zërin e arsyes, kur nuk i merr parasysh këshillat e njerëzve që dinë, do ta paguash pastaj çmimin e paditurisë sate. Vetë, e së bashku me ty edhe të tjerët…!
