Mustafa Bjarami i shkruan dy fjalë të dhimbshme, në shenjë të përvjetorit të LDK-së!

Me rastin e përvjetorit të 30-të të themelimit të LDK-së, Dr. Mustafa Bajrami ka postuar një shkrim të shkurtër por tejet thumbues në lidhje me gjendjen e tanishme të LDK-së, përcjell Gazeta Mejdani.

Ai thotë se në këtë kohë kur edhe më tutje publikohen lista emrash të pjesëmarrësve në tubimin kur ishte themeluar Lidhja Demokratike e Kosovës, gjendja e LDK-së nuk është as për së afërmi ajo për të cilën ishte themeluar kjo lëvizje.

Në lidhje me këtë, ai tërheq një paralele mes “Rilindjes” dhe LDK-së.

Rilindjen e quan “yll i cili dikur shëndriste qiellin e Kosovës” dhe të cilin e fikën dhe e tretën fare, ndërsa për LDK-në thotë se ishte “oda e urtakëve shqiptarë, e akademikëve dhe e njerëzve që e kishin dert hallin e Kosovës dhe të shqiptarëve.

Për më tepër, sipas tij, LDK-së sot i kanë mbetur vetëm tri germat e para, asgjë më tepër. E sa i përket Rilindjes, asaj më si ka mbetur as nam as nishan.

Postimi i tij i plotë:

Shikuar në LDK-në e sotshme, sot në këtë përvjetor të rëndësishëm të saj, detyrimisht më shkon nëpër kokë një pyetje që, dorën në zemër, më shkakton edhe dhimbje:
Pse qenka ‘e shkruar’ që lëvizjet popullore si kjo që e nisi Ibrahim Rugova së bashku me ata burra të mëdhenjë e të thellë që i pati shqiptaria në Kosovë, për 30 vite të përfundojë këtu ku ka rënë LDK-ja?
Si është e mundur që shqiptarët të mos janë në gjendje ta ruajnë një institucion sublim siç ishte “Rilindja”, ose një lëvizje popullore siç ishte LDK-ja. “Rilindjen”, atë yll që shëndriste qiellin e Kosovës, e fikën, e tretën e s’i lanë as nam as nishan. Ndërsa LDK-në, ‘odën’ e urtakëve shqiptarë e prunë në gjendje ku pos tri germave të saj, thuajse gjë s’ka mbetur në te nga fryma e kaluar. Ajo frymë që dikur na qonte peshë. Fryma e Ibrahim Rugovës dhe e akademikëve të tjerë, që ishin bashkë-themeluesë të saj?
E dhimbshme kjo, i dhimbshëm ky fat i yni…!