Në një postim në llogarinë e tij në Facebook, Dr. Mustafa Bajrami ka shkruar me fjalët më të mëdha për gjendjen e tanishme inelektuale dhe të arsimimit në Turqi, përcjell Gazeta Mejdani.
Ai ka thënë se Turqia në këto tridhjetë vjetët e fundit ka bërë revolucion të vërtetë në arsim dhe rrafshe tjera kulturore. Sipas tij, gjendja e tanishme e Turqisë, krahasuar me 30 vjetë më parë, është sikur nata me ditë.
“Marrë guximin të them se populli turk i obligohet shumë dy liderëve politikë të saj: Turgut Ozallit dhe Erdoganit. Këtyre dyve duhet t’iu këndojnë jasina për çdo ditë; të parit për së vdekuri e të dytit për së gjalli. Do të duhej t’i emëronin sheshet dhe rrugët kryesore të qyteteve të Turqisë me emrat e këtyre dy liderëve” ka shkruar Dr. Mustafa Bajrami.
Më tutje, ai përmend disa momente nga jeta e tij personale sa ishte student pos-diplomik në këtë vend.
Thotë se në vitet e 90-ta, në Turqi numroheshin në gishta të dorës autorët që shkruanin në logjikë, drejtim ky në të cilin ai kishte punuar në magjistraturë dhe doktoratë. “Po, tani Turqia është bërë fuqi e botës islame në literaturë, në botime, në përkthime, në numrin e profesorëve e akademikëve universitarë” shton Bajrami.
Për më tepër ai përmend edhe insistimin e Prof. Dr. Mehmet Aydin që të mbetej në Turqi dhe të vazhdonte karrierën akademike në universitetin Dokuz Eylul të Izmirit. Atëbotë, Prof Aydini ishte dekan i fakultetit Ilahijat në Izmir e më vonë, për dy mandate edhe ministër në Qeverinë e Erdoganit.
Më poshtë gjeni postimin e tij të plotë në llogarinë e tij në Facebook:
Duke e ditë si ka qenë Turqia para 30 vjete në rrafshin arsimor dhe të universiteteve, e si është sot, e marrë guximin dhe me plot bindje e them se populli turk i obligohet shumë dy liderëve politikë të saj: Turgut Ozallit dhe Erdoganit. Këtyre dyve duhet t’iu këndojnë jasina për çdo ditë; të parit për së vdekuri e të dytit për së gjalli. Do të duhej t’i emëronin sheshet dhe rrugët kryesore të qyteteve të Turqisë me emrat e këtyre dy liderëve.
Qysh e njoh unë Turqinë e viteve të 90-ta, kur po bëja studimet pas-universitare atje, e si i kanë sot universitetet, populli turk ndoshta do të duhej të bënte edhe më shumë për këta dy liderë politikë.
Në vitin akademik 1993-1994 kur kisha filluar studimet pos-diplomike atje, nuk kanë qenë më shumë se sa 5-6 autorë që shkruanin në logjikë. Nuk e ndjenin veten të lirë sa duhet profesorët e mi, teksa e shpjegonin logikën derisa unë isha në amfiteatër. Me vështirësi gjenim literaturë për lëndët që i kishim në master e doktoratë. Unë u përktheja materiale nga gjuha arabe dhe angleze profesorëve të mi. Jam detyruar të shkoj dy herë në Egjipt për të blerë libra që më nevojiteshin për studime. Prof. Dr. Mehmet Aydin më luste “si për gjak” të qëndroja në Turqi, të mirrja nacionalitetin e Turqisë e të mos shkoja në Dubai. Me insistimin e tij i pata filluar procedurat për të marrë nacionalitetin e Turqisë dhe të qëndroja aty. Edhe sot e kësaj dite i kam të ruajtura në fijok ‘vesikat’ e dokumenteve për nacionalitetin turk.
E sot, Turqia është bërë fuqi e botës islame në literaturë, në botime, në përkthime, në numrin e profesorëve e akademikëve universitarë. Me mijëra e mijëra tituj janë përkthyer në gjuhën tukre përgjatë këtyre tridhjetë viteve. Turqia është bërë vend nga ku dalin kuadro për gjithë botën islame dhe më gjerë. Hapja e bibliotekave osmane për studiues, Turqinë e ka shndërruar në djep të kulturës islame për gjithë botën. Gjë që, deri në kohën e Erdoganit ato biblioteka ishin të mbyllura për studiues.
Ka edhe shumë e shumë çka për të thënë. Ama, kësaj here po e lë me kaq…! /Gazeta Mejdani/
