Që nga paslufta, Kosova asnjëherë nuk ka pasur më shumë nevojë për zgjedhje të reja sa tani. Çdo ditë e më shumë që vonohet, ajo edhe më shumë po kthehet prapa. Duke pësuar humbje të mëdha në të gjitha rrafshet e jetës.
Kjo qeveri, megjithëqë në te ka njerëz që i duhen të ardhmes politike të vendit, si tërësi, si strategji politike e diplomatike, ajo është e paaftë të bëjë më shumë. Njerëzit e njëjtë, me politika të njëjta, plus me potenciale të shtjerra, nuk mund të sjellin rezultate të reja. Përkundrazi, vetëm dëme janë duke i sjellë vendit.
Është koha të lihet prapa mënyra e deritanishme e bërjes politik. E shqiptarëve në përgjithësi. Është kërkesë e dinamikave të kohës të ndryshohen qasjet, njerëzit dhe metodika e punës. E gjithë bota ka filluar të mendoj seriozisht për ndryshime rrënjësore. Efektet e pandemisë në një të ardhme të afërt dhe të mesme do të jenë edhe më të mëdha. Do të ketë ndryshime të paparashikueshme në të gjitha segmentet e jetës së njeriut. Mbase edhe në të menduar. E pra, shtuar kësaj edhe ndryshimet në rrafshet politike të botës, edhe në Kosovë do të fillojnë ndryshimet. Posaçërisht në jetën politike. Kjo elitë politike e deritanishme nuk mund të bëjë më shumë. Zgjedhjet janë mënyra më efikase për t’i bindur të tanishmit se ka skaduar koha e tyre.
Mos harroni: Arrestimet e fundit dhe ato që do të pasojnë, nuk janë dhe nuk do të jenë të rastësishme. As për mënyrën si u bënë e as për momentin. Ato sikur japin sinjale se ka kaluar koha e njerëzve që udhëhoqën deri më tani. Kërkohen fytyra të reja. Emra të rinj dhe metoda reja. Kjo mënyrë e dëbimit të emrave të caktuar nga skena politike është praktikë e njohur nëpër vende të ndryshme të botës. Secila plejadë politike e ka edhe kohën e skadimit. Shkojnë me gjithë kontributet që i kanë dhënë dhe me gabimet e problemet që i kanë krijuar. Por gjithsesi shkojnë. Historia pastaj i shënon të mirat dhe të ligat që ua kanë lënë shoqërive të tyre.
Shpresa e vetme për rimëkëmbje dhe për ecje në hap me kohën është ndryshimi. Ndryshimi nëpërmes zgjedhjeve të reja…!
