Siç njofton Ministria e Shëndetësisë, Qeveria e Republikës së Kosovës do të përkrahë financiarisht qytetarët për shërbime shëndetësore të cilat nuk ofrohen në institucionet publike shëndetësore.
Ministri i Shëndetësisë në Kosovë, Arben Vitia, ka nënshkruar Udhëzimin Administrativ për trajtim mjekësor jashtë institucioneve publike, raporton Anadolu.
Siç njofton Ministria e Shëndetësisë, në udhëzimin administrativ me numër 03/2023 janë përditësuar dhe avancuar rregullat dhe procedurat nëpërmjet të cilave Qeveria e Republikës së Kosovës do të përkrahë financiarisht qytetarët për shërbime shëndetësore të cilat nuk ofrohen në institucionet publike shëndetësore.
Sipas ministrisë, me këtë udhëzim administrativ, përveç që zgjerohet gama e shërbimeve për pacientët që kanë nevojë për trajtim jashtë vendit, evitohen zbrazëtirat që pamundësojnë ofrimin e shërbimeve për qytetarët kosovarë dhe sigurojnë një proces të rregullt dhe transparent.
Me këtë udhëzim administrativ parashihet për herë të parë komision për përcaktimin e çmimeve referente që është kompetent të propozojë përditësimin e shtojcës së çmimeve referente ku përfshihen sëmundjet, gjendja dhe procedurat për mbështetje nga programi për trajtim mjekësor jashtë institucioneve publike.
“Përmes UA Nr: 03/2023 gjithsecili qytetar i Republikës së Kosovës gëzon të drejtën e mbështetjes financiare në vlerë deri në 30 mijë euro brenda një viti për shërbimet që nuk ofrohen në institucionet publike shëndetësore në Kosovë”, njofton ministria, duke nënvizuar po ashtu se “personat me status të invalidit të luftës, anëtarët e ngushtë të familjes së dëshmorëve, viktimat civile të luftës do të kompensohen në shumën maksimale, 100 për qind, të vlerës së faturës”.
Po kështu, me kompensim prej 100 për qind të vlerës së faturës do të përfitojnë edhe personat deri në 18 vjeç, personat me aftësi të kufizuara dhe ata që janë përfitues të ndihmës sociale.
“Personat mbi moshën 18 vjeç kompensohen me 70 për qind të vlerës së çmimit referent apo mesatares së çmimit të tri profaturave për trajtim mjekësor. Ndërkaq, për personat e diagnostikuar me sëmundje malinje mbi moshën 18-vjeçare është rritur vlera e kompensimit”, bën të ditur ministria.
Tutje, Ministria e Shëndetësisë shton se udhëzimi i ri administrativ ka thjeshtuar edhe procedurat e aplikimit për qytetarët, ndërsa referimi dhe përgjegjësia do të jetë te profesionistët shëndetësorë kompetentë të cilët rekomandojnë trajtimin jashtë vendit.
https://www.facebook.com/plugins/post.php?href=https%3A%2F%2Fwww.facebook.com%2Fmustafe.bajrami.104%2Fposts%2Fpfbid02fSXC17QeZxZoVKWGcLiMDXQo6hqWezrvHVFSQp7JMC9zT2diPYvytL3zXH2giWMtl&show_text=true&width=500
