Nënkryetari i Kuvendit të Kosovës, Memli Krasniqi, deklaroi sot se barra për bllokada dhe mosformimin e institucioneve do t’i bie Albin Kurtit.
Nënkryetari i Kuvendit të Kosovës nga radhët e PDK-së, Memli Krasniqi, ka deklaruar se kryetari i Vetëvendosjes Albin Kurti duhet ta dijë si mandatar se jeta institucionale nuk është video lojë dhe lojërat me video nuk i kryejnë punët të cilat i presin qytetarët e Kosovës.
“Kërkesa jonë prej 6 tetorit në mbrëmje ka qenë që ata që kanë kërkuar dhe kanë marrë mandat, sa më herët dhe sa më shpejt ti kryejnë obligimet e tyre por kjo nuk ka ndodhur. Albin Kurti si mandatar duhet ta dijë se jeta institucionale nuk është video lojë dhe lojërat me video nuk i kryejnë punët të cilat i presin qytetarët e Kosovës. Nga sot kur do ta marrë mandatin zyrtarisht, ne ia kujtojmë se ajo nuk është përgjegjësi vetëm me marrë një letër por është përgjegjësi me i formu institucionet. Barra e përgjegjësisë për këtë bllokadë i bien atij si mandatar”, tha Krasniqi s mbledhjes së Kryesisë së Kuvendit.
Ai tha se Albin Kurti dhe Vetëvendosje janë përgjegjës për vonesat dhe bllokadat që po ndodhin në Kosovë që nga 6 tetori.
“Kanë kaluar 106 ditë prej përfundimit të zgjedhjeve të 6 tetorit. Kanë kaluar më shumë ditë prej certifikimit të rezultatit zgjedhor sesa prej zgjedhjeve deri në certifikim dhe ne sot nuk kemi as qeveri e as institucione të certifikuara”, tha Krasniqi.
Zyrtari i lartë i PDK-së foli edhe për mbledhjen e Kryesisë në të cilën ende nuk është e ditur se kush e përfaqëson shumicën parlamentare.
“Fatkeqësisht kanë kaluar më shumë se një muaj prej formimit të Kuvendit dhe ende nuk është mbajtur asnjë seancë apo trajtuar ndonjë projektligj në interes të qytetarëve. Edhe kjo mbledhje që e mbajtëm ishte e imponuar nga miqtë tanë të organizatave ndërkombëtare ku Kosova është anëtare. Këtu vetëm një gjë po dihet sigurt, përfaqësues të opozitës jemi ne PDK-ja. Ndërsa për pozitë ende nuk dihet sepse nuk ka ende shumicë parlamentare formalisht”, tha Krasniqi.
