Ditëve të fundit një avokat i njohur i Kosovës ka filluar të sulmojë pamëshirshëm shaminë. Gratë e mbuluara i konsideron shqetësim dhe rrezik pë Kosovën. Andaj nuk hesht së shkruari kundër mbulesës islame.
Por ky avokat as nuk është i vetmi, e as i pari.
Këtij sulmi mbi shaminë i është bashkangjitur edhe një zyrtar i MASHT-it që paguhet nga taksat e qytetarëve të këtij vendi.
Lajmi se një mori vajzash kanë vendosur mbulesën islame i pengoi zyrtarit të lartë të Ministrisë së Arsimit, Shkencës, Teknologjisë dhe Inovacionit, Agim Krasniqi.
Madje, ai vendosi që këtë ta shfaqë edhe përmes komentit në një postim në faqen e Facebook-ut, “Kur’ani – Mrekullitë e Kur’anit”.
“Mjerim, armiqtë e shqiptarëve janë të fuqishëm dhe të shumtë” – kështu ka komentuar Krasniqi.
I kontaktuar nga SHQIP.com, Krasniqi ka thënë se është ndjerë keq kur ka parë disa vajza, sipas tij të mitura, të cilat vlerëson se me imponim kanë vënë mbulesën islame.
“Një koment e kam bërë në një postim, më ka bërë përshtypje disa vajza të mitura i kishin mbuluar me shami edhe unë e bëra një koment të thjeshtë, diçka shkruajta mjerim apo kështu diçka edhe e kanë keqpërdorë”.
Ai pretendon se vajzat janë duke u manipuluar e keqpërdorur.
“Janë të mitura, janë pre e manipulatorëve, matrapazëve që nuk e njohin funksionimin e shoqërisë dhe shtetit. Nuk i njohin parimet fetare, parimet e besimit dhe manipulohen nga matrapazët të cilët janë duke punuar me të madhe që shoqërinë kosovare ta bëjnë vegël të tyre dhe kjo është e vërteta”, tha ai për SHQIP.com.
Në rrjetet sociale rrodhën edhe transkripte të bisedave në mesazhe private mes Krasniqit dhe Stela Agalliut – grua e mbuluar e cila pretendon se është sharë e ofenduar nga zyrtari i MASHTI-it.
Agalliu tha për SHQIP.com se Krasniqi i bën fajtore gratë me mbulesë për mos anëtarësim të Kosovës në Bashkimin Evropian.
“Ai më tha se ne nuk po hyjmë në BE sepse hixhabi juaj përfaqëson terrorrizmin dhe se duhet të të vijë turp që shpërndan statuse rreth hixhabit”, rrëfeu ajo.
Agalliu madje paralajmëroi se këtë çështje do ta drejton tek organet e drejtësisë në Romë të Italisë.
E këtë bisedë Krasniqi e mohon ta ketë bërë me Agalliun.
“Nuk është e vërtetë, natyra ime nuk lejon me ofendu. Ajo më thirri u prezantua dhe në asnjë moment nuk e kam ofenduar. Uroj të nxjerrët biseda sepse kam qenë shumë korrekt. Dhe jam korrekt sepse jam figurë publike”, u shpreh ai.
Madje, Krasniqi bëri thirrje që shteti të reagojë ndaj këtyre rasteve ndërsa ngritë dyshime se mund të jetë “agjendë me konotacione më të gjëra”.
Krasniqi përveç se është zyrtar i lartë në MASHTI ai është edhe sekretar në Institutin Shqiptar për Gjeopolitikë.
Ai ishte kandidat për deputet në zgjedhjet e jashtëzakonshme parlamentare në vitin 2021 nga koalicioni NISMA-AKR-PD.
Theksojmë se 96 për qind e popullsisë së Kosovës janë myslimanë, të krishterë ortodoksë 1.5% dhe katolikët janë 2.2% në bazë të regjistrimit të fundit nga Agjencia e Statistikave të Kosovës.
Islami është feja dominuese e shpallur nga popullsia etnike shqiptare e Kosovës, boshnjak, goran dhe turk, dhe romë, ashkali dhe egjiptian.
Megjithatë, Kosova bazuar në Kushtetutë është shtet laik.
