Asociacioni i Gazetarëve të Kosovës [AGK] ka bërë një reagim në lidhje me deklaratat publike të aktivistëve të Vetëvendosjes ndaj gazetarit Adriatik Kelmendi pas intervistës së mbrëmshme në të cilën ai i përmendte vazhdimisht qëndrimet e ndërruara pas ardhjes së Kurtit në Qeveri.
AGK thotë se linçimet publike nga zyrtarët e Lëvizjes Vetëvendosje, duke përmendur Sami Kurteshin e Elvis Hoxhës, ishin tejet shqetësuese dhe paraqesin cenim të integritetit personal dhe profesional ndaj gazetarëve.
Kurteshi në statusin e tij i cilësoi pyetjet e Kelmendit si “policore” ndërsa z.Elvis Hoxha nga Shqipëria e kishte cilësuar vetë Kelmendin si “dinak” e “të cektë”.
“Pyetjet e djeshme të gazetarit të Rubikonit përmbanin të njëjtën cektësi cinike si dhe më parë. Me cektësinë dinake ai nuk kuptonte që kryeministri po i jepte dinjitetin e vendit duke i dhënë të drejtë tri herë gjatë bisedës. Nga ana e vet gazetari drejtonte të njëjtën pyetje pesë apo gjashtë herë.” – thuhet në postimin e Hoxhës.
Sipas AGK-së ndërkohë, kjo nuk është hera e parë që zyrtarët partiakë linçojnë gazetarët, autorët dhe drejtuesit e mediave.
“Ne si Asociacion i Gazetarëve te Kosovës, u bëjmë thirrje zyrtarëve të LVV-së që t’i ndërpresin këto praktika të linçimit, me tendencë të frikësimit të gazetarëve. Veprimet e tilla dëmtojnë rëndë imazhin e Kosovës kur në pyetje është liria e shprehjes dhe liria e gazetarëve për ta ushtruar profesionin e tyre”, thuhet në njoftim.
AGK po ashtu kërkon nga kryeministri i Kosovës Albin Kurti, njëherësh udhëheqës i Lëvizjes Vetëvendosje, që t’i bëj thirrje partisë së tij të distancohet nga linçimet e tilla të rrezikshme për demokracinë dhe të kontribuojnë për një mjedis më të mirë, ku të gjithë mund të shprehen lirshëm dhe ku gazetarët mund ta ushtrojnë profesionin e tyre pa u penguar nga askush.
