Kush është Zeljko Bojiq: Serbi i kërkuar nga Policia e Kosovës!

Zeljko Bojic, polici serb në veriun e Kosovës, po konsiderohet si një prej personave të dyshuar për lidhje me vrasjen e politikanit serb, Oliver Ivanovic.

Policia e Kosovës në mëngjesin e sotëm bastisi banesën e Bojic, ndonëse këtë të fundit nuk e gjeti aty pasi dyshohet se është arratisur në Budva të Malit të Zi, arrestoi djalin e tij Velko Bojic.

Por kush është Zeljko Bojic?

I kërkuar kryesor prej Policisë së Kosovës në operacionin e zhvilluar sot Zeljko Bojic, po konsiderohet si një person shumë i rrezikshëm.

Ky i fundit, është shef i operativës së Policisë në pjesën veriore dhe po dyshohet për fshehjen e provave në rastin e vrasjes së Oliver Ivanovicit.

Madje, siç u bë e ditur kohë më parë, Bojic është lidhja kryesore në Polici e Milan Radojcic, i dyshuar kryesor në rastin e Vucicit.

Pushteti i tij, shtrihet mbi policinë në veri, ndërsa Zeljko është parë shumë herë bashkë me Milan Radojcic.

Bojic, shoqëri ka edhe me  Zvonko Veselinovic, të njohur si ‘baba i urës së Ibrit’. Për Veselinovic’in është raportuar shumë, madje është thënë se ndikimi i tij politik në veri por edhe në Serbi është aq i madh, sa ai kishte vendosur për heqjen ose jo të barrikadës mbi urën e Ibrit.

Kujtojmë se në aksionin e sotëm përpos djalit të Zeljko Bojic, është arrestuar edhe një person tjetër dhe janë konfiskuar armë e municione.

Detaje rreth rastit, më herët për Gazeta Metro ka dhënë edhe Zëdhënësi i Policisë, Baki Kelani, ku ka thënë se në aksionin e sotëm janë gjetur dhe konfiskuar tri armë dhe municion ndërsa janë arrestuar dy persona.

“Mund të konfirmojmë se sot në orët e hershme të mëngjesit, në Veri të Mitrovicës Policia e Kosovës ka realizuar një operacion policor i cili ndërlidhet me rastin e vrasjes se z. O. Ivanoviq. Ky operacion policor është realizuar në bazë të urdhëresës për kontroll të lëshuar nga Gjykata Themelore , Departamenti Special, i cili ka rezultuar me arrestimin e një personi te dyshuar zyrtar policor i nacionalitetit serb ( R. B. ) i përfshirë në urdhër kontroll, përderisa i dyshuari tjetër po ashtu pjesëtar policor mbetet në kërkim.”, tha Kelani.

Metro do t’iu mbajë të informuar me zhvillime të tjera rreth kësaj ngjarje.